Në 1997-ën, mjeshtri i etiketimeve e quajti Kuvendin e drejtuar nga e majta, Parlamenti i Kallashnikovëve. Tani, duke nisur që nga 2013-a, e quan edhe parlamentin, edhe të majtën në përgjithësi fole të krimit.
Doktori, e mbas tij e gjithë opozita pretendon se kriminelë të djeshëm, trafikantë, banditë e të dënuar nga gjykata të huaja kanë desantuar në politikë. Për ta pastruar politikën nga ta, madje u shpik dhe termi dekriminalizim. U bë dhe një marrëveshje vjet në dhjetor, marrëveshje në minutën e fundit që e rifuti me dinjitet PD-në në Kuvend.
U përfshinë të gjithë në përpjekjen për dekriminalizim, edhe vendasit, edhe partnerët ndërkombëtarë dhe u mendua se do të bëhej nami, se askush me të kaluar të errët nuk do të depërtonte më në listat e partive.
Sot u dha lajmi. Rrjetat shqiptaro-ndërkombëtare e paskan kapur një…peshk. Që ndodhej në malësinë e Këlcyrës dhe konkuronte për PD-në. Këlcyra është një vend i ashpër anës Vjosës dhe rrëzë malesh të ashpër. Që kësaj rradhe qëlluan shtatzanë; ishin mbarsur dhe pollën të vetmin kandidat që duhet të largohet nga konkurimi.
Tani u zbulua e keqja. Madje më e keqja, tani mjeshtri i etiketimeve është në lojë: pritet çdo të thotë për këtë lindje të vështirë dhe pa narkozë të maleve në Këlcyrë. Se e ka të “lindurin” në shtëpi.
