Dosja e të shumëkërkuarit Alket Hatija rikthehet për gjykim. Kjo është vendosur nga Gjykata e Lartë, me një trupë provizore të caktuar nga KLGJ-së për rastet e urgjencës.
Kryesuesi dhe relator i çështjes është Ardian Dvorani, ndërsa në trupën gjykuese janë edhe katër gjyqtarë të tjerë që e kanë kaluar me sukses vetingun, Sokol Binaj, Sahida Dollani, Albana Boksi dhe Enton Dhimitri.
Gjykata e Lartë vendosi rigjykimin e kësaj dosje me argumentin se “Gjykimi dhe vendimi ishte me mangësi të theksuara”.
Alket Hatia është i lirë prej 11 korrikut të 2017, pas vendimit të Gjykatës së Shkallës së Parë të Durrësit.
Kjo e fundit rrëzoi kërkesën për ekstradimin e Alket Hatisë në Itali në datë 5 mars të vitit 2018, pasi sipas saj, Hatia e ka kryer dënimin 16 vite në Shqipëri për të njëjtat vepra penale që akuzohet në Itali.
Vendimi është marrë nga gjyqtari Paulin Çera.
Hatia u arrestua me 8 korrik me urdhër të Prokurorisë së rrethit Durrës, pasi emri i tij u shfaq në sistemin e personave të shpallur në kërkim ndërkombëtar nga Interpol Roma.
Ai është dënuar nga Gjykata e Milanos me 20 vjet burg për trafik narkotikësh.
Por Hatija, që ka vuajtur një dënim në Shqipëri, pretendon se e ka shlyer dënimin për të njëjtat fakte penale që është gjykuar edhe në Itali.
Dënimi për të u dha pasi akuzohet për transportimin në Milano, në vitet 2003-2004, të 350 kilogramëve heroinë dhe 190 kg kokainë, ngarkesa këto me vlerë 35 deri në 45 milionë euro.
44-vjeçari prej kohësh dërgonte qindra kilogramë heroinë dhe kokainë nga Shqipëria në Itali.
Agjentët shqiptarë e kanë arrestuar atë në Durrës, teksa Hatija po shkonte të takonte një mikun e tij.
Ky i fundit jetonte në një vilë bunker në qytetin e Beratit, e cila vëzhgohej me kamera dhe truproja të armatosura.
Për vite me radhë ai kishte mundur të humbiste gjurmët, ndërsa hetimet zbuluan se 45-vjeçari kishte arritur të transportonte të paktën 49 herë sasi të ndryshme droge drejt vendit fqinj.
Hatija u prangos më 8 korrik, por Gjykata e Durrësit e cilësoi të jashtëligjshëm arrestimin e tij, duke e lënë të lirë, çka përbënte një skandal.
Tashmë ai do të rigjykohet sërish. /Tema/
