Operacioni “Forca e Ligjit” mbetet në fuqi edhe pas ankimimit në Gjykatën Kushtetuese. Kjo e fundit është shprehur për një aksion të pretenduar si të paligjshëm nga subjekti i prekur me një sekuestrim automjeti.
Më konkretisht, po flasim për aktin Normativ nr.1, të datës 31 janar të vitit 2020, në kohën kur ministër i brendshëm ishte Fatmir Xhafaj, i cili e inicioi këtë nismë ligjore, “për masat parandaluese në kuadër të forcimit të luftës kundër terrorizmit, krimit të organizuar, krimeve të rënda dhe konsolidimit të rendit e sigurisë publike”.
Edlir Hysenaj, subjekt i OFL, ishte ankuar në Gjykatën Kushtetuese duke atakuar aktin normativ në fjalë. Ai pretendonte se i është sekuestruar padrejtësisht një automjet nga OFL, pasi vëllai i tij rezulton i skeduar për drogë në Gjermani.
Pasi e ka shqyrtuar kërkesën, Gjykata Kushtetuese e ka rrëzuar, duke mos konstatuar antikushtetueshmëri në veprimet dhe funksionimin e OFL.
Hysenaj kishte kërkuar “shfuqizimin si të papajtueshëm me Kushtetutën e Republikës së Shqipërisë të vendimit nr.00-2021-241, datë 13.04.2021 i Gjykatës së Lartë”.
Avokati i ankimuesit pretendonte se ky akt normativ cënon sigurinë juridike të shtetasit Edlir Hysenaj dhe të drejtën për një proces të rregullt ligjor, pasi të ardhurat e tij janë vlerësuar si të ligjshme nga organi që ka kompetencë për të verifikuar pasurinë e këtij shtetasi.
Pra, është cënuar parimi “ne bis in dem”, mosndëshkimi pa prova, prezumimi i pafajësisë, barra akuzese, barazia e palëve. Gjithashtu, është pretenduar se pasuria e subjektit dhe familjes së tij është hetuar një herë për veprën penale “Pastrim i produkteve të veprës penale ose veprimtarisë kriminale” dhe nga gjykata është vendosur pushimi i procedimit penal.
/a.r
