Gjykata e Tiranës ka lënë në burg, Pajtim Agën, vëllain e Robert Agës, ish-shefit të Policisë dhe 6 të arrestuarit e tjerë, të cilët u arrestuan për trafik droge.
Më 18 janar Policia e Shtetit arrestoi 7 persona dhe sekuestroi 32.5 kg lëndë narkotike cannabis sativa në formë çokollate gjatë operacionit të koduar “TRANZIT”. Sipas Policisë 7 të arrestuarit merrnin kanabisin në formë çokollate në Greqi, e kalonin atë mes Konispolit, e më pas e sillnin në Tiranë. Më pas ata e trafikonin atë drejt një qyteti verior, për të dalë sërish jashtë Shqipërisë. Personat që janë tashmë në qeli janë: Pajtim Aga, 51 vjeç, Marsilda Piperi, 32 vjeçe nga Gjirokastra, Fatjon Dedaj, 37 vjeç, bashkëjetues me Piperin, Shkëlqim Mazari, 51 vjeç, banues në Kombinat, si edhe Edmond Rajta, 52 vjeç, banues në Tiranë, Devis Mija, 20 vjeç, banues në Kombinat, Tiranë dhe Arjet Halilaj, 38 vjeç, banues në Lezhë.
Pajtim Aga është vëllai i shefit të policisë së Dibres, Robert Agës, i cili pas arrestimit të të vëllait Robert Aga u shkarkua nga detyra.
Pajtim Aga është pjesë e grupit me 7 të arrestuar që u godit. Ata merrnin lëndë narkotike të llojit “Cannabis sativa në formë çokollate” në Greqi dhe e sillnin në Shqipëri përmes pikë kufitare të Konispolit, nëpërmjet dy personave që jetonin në Gjirokastër.
Me pas lënda narkotike transportohej në qytetin e Tiranës, me qëllim për t’u nisur më vonë në një qytet në veri të vendit dhe për t’u trafikuar jashtë Shqipërisë. Gjatë operacionit u sekuestruan 32.5 kg lëndë narkotike canabisa sativa në formë çokollate, 6 aparate celulare dhe 2 automjete.
g.kosovari
