Ditën e sotme drejtuesi i një autoboti u arrestua ndërsa pronari i subjektit privat u shpall në kërkim, pasi tentuan të ndosnin ujërat e Borshit.
Policia bën të ditur se, shërbimet e Komisariatit të Policisë Himarë kanë marrë informacion se gjatë natës do të derdhej një autobot me ujëra të zeza në lumin e Borshit, ndaj kanë ndërhyrë për parandalimin e këtij krimi mjedisor.
Sipas bluve në kuadër të operacionit “Pollution”, u kap në flagrancë teksa tentonte të derdhte ujëra të zeza një 40-vjeçar, u procedua në gjendje të lirë ndihmësi i tij, ndërsa u shpall në kërkim pronari i subjektit që kishte në pronësi autobotin.
“Tentuan të ndotnin ujërat e lumit të Borshit, duke derdhur ujëra të zeza, gjatë natës, me autobot, arrestohet në flagrancë drejtuesi i autobotit dhe procedohet penalisht ndihmësi i tij.
Shpallet në kërkim pronari i subjektit ekonomik për llogari të të cilit kryhej kjo veprimtari kriminale. Sekuestrohet autoboti. Si rezultat i informacioneve të siguruara nga shërbimet e Komisariatit të Policisë Himarë, në rrugë operative, se gjatë natës, do të derdhej një autobot me ujëra të zeza, në ujërat e lumit të Borshit, këto shërbime kanë ndërhyrë menjëherë dhe kanë bërë të mundur parandalimin e këtij krimi kundër mjedisit.
Në kuadër të operacionit policor të koduar “Pollution”, u kap në flagrancë teksa tentonte të derdhte ujëra të zeza, në lumë, me autobotin që drejtonte, dhe u arrestua shtetasi G. Q., 40 vjeç, banues në Sarandë. Gjithashtu, u referuan materialet në Prokurori ku nisi procedimi në gjendje të lirë për ndihmësin e 40-vjeçarit, shtetasin S. K., 44 vjeç, banues në Sarandë.
Nga veprimet hetimore rezultoi se këta shtetas e kryenin këtë veprimtari kriminale për llogari të një subjekti privat në pronësi të shtetasit S. Ç. Ky shtetas u shpall në kërkim dhe vijon puna për kapjen e tij. Në vijim të veprimeve procedurale u sekuestrua mjeti autobot.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme”, thuhet në njoftimin e policisë.
