U kap me drogë, gjykata lë në burg vëllai i kryebashkiakut të Poliçanit
Gjykata e Beratit ka dhënë masën e sigurisë arrest me burg për vëllain e kreut të bashkisë Polican, Artur Zotkaj, i cili është arrestuar pasi gjatë një kontrolli në lokalin e tij iu gjet një sasi prej 19.030 kg drogë.
Pas arrestimit të vëllait të kryebashkiakut të Poliçanit, Artur Zotkaj, Prokuroria e Beratit zbardhi të tjera detaje lidhur me mënyrën e kapjes së personave të implikuar në trafikun e drogës.
Sipas Prokurorisë së Beratit, Policia i ka referuar materialet për hetim proaktiv ndaj Kreshnik Hysenbellit, i dyshuar për prodhim, shitje e kultivim të bimëve narkotike.
Pas hetimit, ka rezultuar se Hysenbelli ka komunikime të dyshimta për shitje lënde narkotike me një person, i identifikuar më pas si shtetasi Artur Zotkaj (vëllai i kryebashkiakut Adriatik Zotkaj), banues në Poliçan, si dhe me një shtetas italian (Fabricio).
