Në GJKKO, këtë të martë, është mbajtur seanca e radhës për konfiskimin e pasurive të Ervis Martinajt dhe familjarëve të tij. Në këtë seancë u paraqit për të disatën herë edhe babai i ish-bosit të lojërave të fatit, Mustafa Martinaj.
Pas daljes nga SPAK, Mustafa Martinaj nuk i kurseu kritikat dhe akuzat ndaj Prokurorisë së Posaçme lidhur me zhdukjen e të birit. Ai tha se u ka dhënë autoriteteve koordinatat e sakta të vendit ku është zhdukur i biri, si dhe emra konkretë.
Më tej, ai akuzoi se askush nuk është interesuar për zbardhjen e ngjarjes.
“U kam dhënë koordinatat e sakta dhe emra konkretë. I kam thënë të gjitha në SPAK kur erdha dëshmova me kërkesën time, askush nuk është interesuar që atëherë”, tha ai në një prononcim të shkurtër për gazetarët.
Biznesmeni dhe një nga njerëzit më të njohur të botës së krimit në Shqipëri, Ervis Martinaj, rezulton i zhdukur pa gjurmë prej 9 gushtit të vitit 2022. Ai ishte shpallur në kërkim nga SPAK dhe dyshohej se fshihej pas disa atentateve ndaj miqve të tij të ngushtë. Për herë të fundit, ai raportohet të jetë parë pranë Shijakut.
Ish-agjenti i Operacionales, Jeton Lami, ishte shoqëruesi i tij, por ai nuk ka pranuar të flasë.
Që prej asaj kohe, Ervis Martinaj është zhdukur pa gjurmë dhe fati i tij mbetet mister. Herë deklarohet se ai është vrarë, e herë se është larguar vetë nga “qarkullimi” për t’i shpëtuar hakmarrjes së grupeve rivale. Autoritetet shtetërore, pavarësisht deklarimeve, ende nuk kanë një pistë zyrtare për atë çfarë ka ndodhur me të ashtuquajturin “mbreti i kumarit”.
