Presidenti i zgjedhur i SHBA-ve, Donald Trump foli për një fotografi të bërë virale midis tij dhe ish-presidentit demokrat Barack Obama në funeralin e Jimmy Carter të enjten.
Dyshja u ulën së bashku në ceremoninë për ndarjen nga jeta të ish-Presidentit të ndjerë në Uashington DC të enjten dhe mund të shiheshin duke folur për disa minuta me njëri-tjetrin.
Obama u pa duke tundur kokën teksa foli pasardhësi i tij përpara se të buzëqeshte. I pyetur për këtë pjesë, Trump tha: “Nuk e kuptova se sa miqësor dukej”.
“Unë thashë, ‘djalë, ata duken si dy njerëz që pëlqejnë njëri-tjetrin’. Dhe ne ndoshta po”, tha Trump, shkruan A2 CNN.
“Ne kemi një filozofi paksa të ndryshme, apo jo? Po, ndoshta kemi. Nuk e di. Por shkuam mirë. Por unë shkova mirë me pothuajse të gjithë atje”, tha më tej Trump.
Shkëmbimi miqësor mes tyre vjen pas vitesh kritikash ndaj njëri-tjetrit në sytë e publikut; ishte zoti Trump ai që përhapi të ashtuquajturën teori konspirative “të lindjes” për zotin Obama në vitin 2011, duke pohuar se ai nuk kishte lindur në Shtetet e Bashkuara.
Fyerjet vazhduan për vite me rradhë, me zotin Obama që ia dedikoi fjalimin e fundit të darkës së korrespondentëve të Shtëpisë së Bardhë në vitin 2016, shakave në kurriz të rivalit të tij politik.
Trump ka sulmuar vazhdimisht familjen Obama, duke thënë se ish-presidenti ishte “i paefektshëm” dhe “i tmerrshëm” dhe duke e quajtur ish-zonjën e parë Michelle Obama “të keqe” deri në tetor të vitit të kaluar, shkruan A2 CNN.
Në gjurmët e fushatës së Kamala Harris vitin e kaluar, Obama tha se Trump ishte një “miliarder 78-vjeçar që nuk ka pushuar së qari për problemet e tij që nëntë vjet më parë”, ndërsa ish-zonja e parë tha se “pasojat që ai të jetë përsëri President janë brutalisht të rënda”.
