Në hollin e Pallatit të Kongreseve në Tiranë, sot do të mbahen homazhe në nderim të gjyqtarit Astrit Kalaja, i cili humbi jetën dy ditë më parë pasi u qëllua me armë brenda ambienteve të Gjykatës së Apelit, teksa ishte në krye të detyrës.
Ngjarja tronditëse ka lënë gjurmë të thella në sistemin e drejtësisë dhe ka ngritur shqetësime serioze mbi nivelin e sigurisë në institucionet shtetërore. Vrasja e gjyqtarit në mes të sallës së gjyqit përbën një precedent të rrezikshëm për shtetin dhe rendin ligjor në Shqipëri.
Ceremonia e homazheve do të nisë në orën 09:00 dhe do të zgjasë deri në orën 11:00. Gjatë kësaj kohe, përfaqësues të lartë të shtetit, kolegë nga sistemi gjyqësor, familjarë dhe miq do t’i japin lamtumirën e fundit gjyqtarit Kalaja.
Pas përfundimit të ceremonisë në Tiranë, arkivoli me trupin e tij do të përcillet drejt qytetit të lindjes, Shkodrës, ku në orët e pasdites (14:00–16:00) do të bëhet edhe varrimi.
Astrit Kalaja u vra nga Elvis Shkambi, nipi i Gjon Shkambit, një nga palët e përfshira në një konflikt pronësie që po shqyrtohej në gjykatë. Në ngjarje mbetën të plagosur edhe dy persona të tjerë, Ragip dhe Ervis Kurtaj, babë e bir, të cilët ishin gjithashtu palë në procesin gjyqësor.
