Këtë të shtunë u finalizua me sukses ekstradimi drejt Italisë dhe Spanjës, i tre shqiptarëve të cilët kërkoheshin nga autoritetet e këtyre dy vende për vepra të ndryshme penale, si grabitje, vrasje dhe trafik droge.
Ndaj tyre, kishte urdhër-arresti të njoftuara në Interpol, ndaj dhe janë ndaluar sapo janë lokalizuar në territorin shqiptar. Shkëlzen Keqi, Daniel Gjoni dhe Dienis Hoxhaj janë tre shqiptarët që u ekstraduan drejt Italisë dhe Spanjës por, për çfarë akuzohen këta shtetas?
Shkëlzen Keqi në gusht të vitit 2022 u përfshi në vrasjen e 36-vjeçarit Elson Kalaveri. Ngjarja ndodhi në rajonin e Pizas në Itali dhe pas një sërë hetimesh intesive nga autoritetet italiane rezultoi se Shkëlzen Keqi ishte porositësi i kësaj vrasje. Lidhur me këtë ngjarje më 15 shtator të 2023 u arrestuan dy shqiptarë dhe tre italiane. Katër prej tyre u arrestuan nga karabinierët e Pizas në Itali ndërsa, Shkëlzen Keqi u arrestua në Fushë-Krujë.
E gjithë kjo ngjarje ndodhi për shkak të hakmarrjes, pasi në vitin 2014 Elson Kalavari ekzekutoi vëllain e Shkëlzen Keqit, Genti Keqi. Elson Kalaveri qëlloi me armë zjarri fqinjin e tij Genti Keqi brenda ambienteve të Komisariatit të Mamurrasit. Kalaveri aso kohe deklaroi se gjithça e kishte bërë për vetëmbrojtjeje.
Gjithashtu ditën e sotme u bë i mundur ekstradimi drejt Italisë i një tjetër shqiptari, 23- vjeçarit Daniel Gjoni. I riu shqiptar kërkohej për llogari të drejtësisë italiane pasi në gusht të vitit 2023, në bashkëpunim me shtetas të tjerë ka dhunuar, rrëmbyer një shtetas në Itali dhe i ka kërkuar para në këmbin të lirimit. Ndërsa në muajin gusht të vitit të kaluar ai u ka vjedhur shuma parash disa adoleshentëve duke përdorur dhunë ndaj tyre, në Cassano d’Adda dhe Vaprio d’Adda.
Arrestimi i Gjonit u bë i mundur nga policia shqiptare. Ai u ndalua më 28 tetor në Laç me qëllim për tu ekstraduar në Itali.
Ndërsa në Spanjë u ekstradua Dienis Hoxhaj (Haskaj (Jazaj). Gjatë vitit 2023, si pjesëtar i një grupi kriminal, 34-vjeçari ka qenë i përfshirë në veprimtarinë e kultivimit të bimëve narkotike, në ambiente të mbyllura, nëpërmjet lidhjeve ilegale të energjisë elektrike. Grupit kriminal ku bënte pjesë 34-vjeçari, i janë sekuestruar 13 196 bimë narkotike cannabis sativa./m.j
