Pamje vërtet trishtuese pas zjarrit që përfshiu një zonë të pyllëzuar në fshatin Shetel të Shijakut, një prej zonave më të largëta rurale të Durrësit.
Banorët thonë se zjarri u vu nën kontroll, por dëmet që la pas janë të konsiderueshme. Ata thonë se zjarrfikëset e Shijakut dhanë ndihmën e tyre deri në shuarjen e vatrave të flakëve, por terreni ka qenë i vështire dhe era favorizoi flakët e zjarrit, që dëmtuan kryesisht edhe tokat me pemëtore dhe ullinjtë e zonës.
Ndërhyrja është bërë e vështirë për zjarrfikësit për shkak të terrenit shumë të thyer dhe vetë banorët kanë ndihmuar që flakët të izoloheshin për të mos rrezikuar banesat në fshat. Sot banorët apelojnë për ndihmë, pasi sipas tyre, djegia nga zjarri i ullinjve dhe pemëve frutorë ju ka shkaktuar dëme të mëdha. Ata kërkojnë që strukturat e shtetit të nxjerin ekipet në terren për të bërë verifikimin e dëmeve.
Ndërkohë, Policia bëri me dije se nga shërbimet e Komisariatit të Policisë Shijak, u bë arrestimi në flagrancë i shtetasit Ibrahim Biba, banues fshatin Shetel, Njësia Administrative Gjepalë, Shijak.
Shërbimet e Komisariatit të Policisë Shijak, sapo morën njoftimin se mbrëmjen e djeshme në territorin e fshatit Shetel kishte rënë zjarr, i cili përfshiu një sipërfaqe të madhe të pyllëzuar dhe që, për shkak të erës së fortë, rrezikonte të përfshinte edhe banesat, u nisën menjëherë drejt vendngjarjes.
Arrestimi i tij u bë pasi, mbrëmjen e djeshme, rreth orës 20:00, duke djegur mbeturina në tokën e tij, zjarri i ka dalë jashtë kontrollit dhe ka përfshirë një sipërfaqe të madhe të pyllëzuar në fshatin Shetel, duke rrezikuar edhe banesat pranë.
Policia e Shtetit apelon për të gjithë banorët të mos ndezin zjarr për djegien e mbeturinave apo të mbetjeve të prodhimeve bujqësore, si dhe për qytetarët të shmangin hedhjen e cigareve të ndezura pranë sipërfaqeve të pyllëzuara. /bw/
