Një penallti e akorduar dhe më pas një goditje fatale në kokë. Dhuna në Kategorinë e Dytë rikthehet në formën më të shëmtuar të mundshme. Një ngjarje që mund të kishte rezultuar fatale për arbitrin nga Vlora, Ardit Merdanaj, i cili ra pre e dhunës së lojtarit të Domosdovës, Altin Lleshi.
Gjithçka ndodhi në një ndeshje ku asnjë prej ekipeve nuk ka objektiva dhe vetëm luajnë për të respektuar kampionatin. Por, kjo nuk ka mjaftuar që vetëm për akordimin e një 11-metërshi gjyqtari të rrezikojë jetën, përfundon në spital dhe nuk dëgjon më nga veshi i djathtë.
Ishte minuta e 58-të e ndeshjes në Tepelenë ku rezultati ishte 1-0 për miqtë nga Përrenjasi. Në këtë moment, gjyqtari vlonjat akordon 11-metërsh për vendësit, gjë që është kontestuar nga sulmuesi Lleshi. Pasi është ndëshkuar me kartonin e kuq për shtyrje të arbitrit, lojtari ka goditur me grusht në kokë Merdanajn. Pas kësaj, ndeshja është ndërprerë menjëherë, në një kohë që Lleshi është shoqëruar në komisariatin e Tepelenës dhe e ka kaluar aty natën e mbrëmshme.
RRËFIMI
Në një rrëfim ekskluziv për “Panorama Sport”, gjyqtari i dhunuar Merdanaj tregon gjithçka ndodhi në sfidën e Tepelenës.
“Në një moment, akordoj penallti për Tepelenën dhe ndëshkoj me karton të verdhë lojtarin që e shkaktoi atë. Dhe ai lojtar nuk reagoi duke pranuar vendimin. Në këtë moment vjen futbollisti tjetër i Domosdovës Altin Lleshi dhe më shtyn duke protestuar për penalltinë. Unë i nxjerr kartonin e kuq dhe më pyet se pse e ndëshkoj. Unë ia argumentoj këtë për veprimin që bëri dhe e pranoi.
Lojtari largohet dhe unë shkoj në zonë për të pritur ekzekutimin e 11-metërshit. Në këtë moment, Lleshi merr vrull dhe vjen e më godet me grusht nga mbrapa kokës duke më kërcënuar njëkohësisht. Unë isha në gjendje të lirë dhe nuk e prisja këtë goditje, madje as delegati, vëzhguesi apo lojtarët e tjerë. Të gjithë u habitën se si e bëri atë veprim, pasi futbollisti po dilte nga fusha.
M’u krijua një gjendje të fikti dhe isha i turbulluar. Më pas ndërhyri policia që më ndihmoi dhe u qetësua situata. E gjithë kjo histori ishte pa arsye. Më pas, delegati dhe vëzhguesi kontaktuan me zyrtarët e FSHF-së dhe vendosa ta ndërpres takimin. Rregullorja e thotë qartë që nëse arbitri dëmtohet nga faktorë të jashtëm, takimi ndërpritet automatikisht. U thirrën kapitenët dhe përfaqësuesit e klubeve dhe iu komunikua vendimi dhe u pranua ajo që ndodhi”, rrëfen gjithçka ndodhi në fushë gjyqtari vlonjat.
“Më pas shkova në komisariat dhe bëra denoncimin sipas rregullave dhe lojtari që më dhunoi Lleshi u shoqërua në polici dhe do mbahej aty gjatë natës. Ai ishte i papërmbajtshëm, pasi, përveçse më goditi mua, pati përplasje edhe me forcat e rendit. Ndërsa, lojtari tjetër Ardit Facja më shau dhe ofendoi”, tha arbitri vlonjat.
PASOJA
Për rreth dy orë, gjyqtari i dhunuar qëndroi në spitalin e Tepelenës ku mori mjekimin e nevojshëm. Në rrëfimin e tij, Merdanaj tregon edhe për pasojat që i kanë mbetur pas goditjes së djeshme.
“Kam dhimbje në kokë dhe nuk dëgjoj fare nga veshi i djathtë. Tani jam rrugës dhe do të shkoj menjëherë në spitalin e Vlorës për të bërë kontrolle më të imtësishme me skaner. Nuk e kuptoj një veprim të tillë”, tha arbitri. Me një shumë thuajse qesharake prej vetëm 100 mijë lekësh të vjetër në një takim, arbitrat rrezikojnë edhe jetën në Kategorinë e Dytë.
“Edhe pse ishte një ngjarje e rëndë, nuk do të tërhiqem. Është një punë që e kam nisur me pasion dhe do ta vazhdoj. Pavarësisht pagesave dhe asaj që ndodhi, unë nuk tërhiqem. E keqja do të dënohet përherë”, përfundoi rrëfimin e tij të dhimbshëm gjyqtari që ra pre e dhunës dje në Tepelenë./panorama
c.a
