Skafi që u shpëtua një ditë më parë falë operacionit të kërkim-shpëtimit të Forcave të Armatosura, pasi ishte bllokuar ne det në mungesë të karburantit, kishte kaluar kufirin në mënyrë të paligjshme.
Specialistët për Hetimin e Krimeve në Drejtorisë Rajonale për Kufirin dhe Migracionin Durrës filluan procedimin penal në gjendje të lirë në ngarkim të shtetasve: Adrian Jahaj 51 vjeç, banues në Vlorë dhe D.L. 32 vjeç, banues në Brindizi, Itali.
Sipas policisë, “më datë 06.11.2016 shtetasit e mësipërm kanë qenë duke ardhur me një mjet tip “Motoskaf” me mbishkrimin “Pantera”nga Brindizi, Itali për në Shqipëri. Në vendin e quajtur Sazan, Vlorë kanë dhënë sinjalin SOS dhe i është dhënë ndihmë nga një anije ushtarake dhe më pas mjeti është ankoruar në Portin Detar Durrës. Nga ana e Specialistëve janë kryer të gjitha veprimet e para proceduriale ndaj këtyre shtetasve dhe ka rezultuar se ata kanë kaluar kufirin pa kryer procedurën përkatëse”.
Materialet i kaluan Prokurorisë së Rrethit Durrës për veprime të mëtejshme për veprën penale “Kalim i paligjshëm i Kufirit Shtetëror”.
SKAFIT I MBAROI KARBURANTI
Skafi privat që udhëtonte nga Italia në drejtim të Shqipërisë, mbeti i bllokuar për rreth 10 orë në mes të detit Adriatik, 10 milje në veriperëndim të ishullit të Sazanit. Alarmin për policinë kufitare e dha djali i drejtuesit të skafit, Adrian Jahaj.
Prej orëve të para të mëngjesit të djeshëm Forcat e Armatosura vijuan operacionet e kërkim-shpëtimit të shtetasit Adrian Jahaj, i denoncuar si i humbur në det.
Lokalizimi i skafit me dy persona në bord, kapiteni i mjetit lundrues Adrian Jahaj dhe një shtetas italian, u bë pas 10 orë kërkimesh në det nga dy anije dhe një helikopter “Cougar” i Forcave të Armatosura. Lajmin për lokalizimin e skafit e dha për Report Tv, kapiteni i anijes “Oriku”, Ilir Çobo.
Skafi u ankorua në portin e Durrësit rreth 2 orë pas gjetjes në det. Në bordin e skafit kanë qenë dy persona, drejtuesi i skafit Adrian Jahaj dhe një shtetas italian.
Mjeti lundrues tip skaf ishte nisur mbrëmjen e djeshme nga Italia, por u bllokua në mes të detit si pasojë e mungesës së karburantit.
