TIRANE – Gjykata për Krimet e Rënda ka shfryrë një operacion policor të përcjellë me bujë në shkurt 2014 për zbulimin e një grupi kriminal që merrej me trafik armësh e municionesh nga Shqipëria në Kosovë.
Mes të arrestuarve, që më pas u dërguan si të pandehur në gjykatë, ishin edhe dy punonjës të Ministrisë së Brendshme dhe të Policisë së Shtetit, të dyshuar si të përfshirë në këtë linjë trafiku.
Pas 35 seancash shqyrtimi gjyqësor, Gjykata për Krimet e Rënda e ka vlerësuar të paprovuar akuzën e prokurorisë për “trafik të armëve dhe municiont”. Në vendimin përfundimtar gjykata ka ndryshuar kualifikimin e veprës penale, duke i fajësuar ata për akuzën e “prodhimit dhe mbajtjes pa leje të armëve dhe municionit”.
Të pandehurit e kësaj dosjeje janë Fadil Sula, i dyshuar si organizator i grupit, ish-inspektor në Drejtorinë Rajonale të Kufirit e Migracioni, Kukës dhe Abedin Plaku, Erion Zisko dhe Lorenc Zyli.
Sipas vendimit të shpallur pak ditë më parë, i pandehuri Sula u dënua me 9 vjet heqje lirie, Plaku me 7 vjet dhe Zisko u dënua me 6 vjet, të tre për akuzën e mbajtjes së armëve luftarake. Për të pandehurin Lorenc Zyri, i cili, përveç armëmbajtjes, u fajë- sua dhe për “prodhim e shitje të narkotikëve”, gjykata dha një dënim me 8 vjet burg. Sipas Prokurorisë, për Krimet e Rënda hetimi ndaj të pandehurve u zhvillua në bashkëpunim me Shërbimin e Kontrollit të Brendshëm në Ministrinë e Punëve Brendshme.
Sipas hetimit, inspektori i policisë, Fadil Sula, në kohë të ndryshme, që prej fillimit të vitit 2012 e në vazhdim, ka kryer trafikimin e armëve dhe municionit luftarak nga territori i Shqipërisë në territorin e Kosovës.
Nga të dhënat dyshohej se armatimi sigurohej në zonën e Gramshit në bashkëpunim edhe me persona të tjerë kundrejt përfitimit në vlera të konsiderueshme monetare.
Në kuadër të hetimit, më 11 shkurt 2014 i dyshuari Sula ka udhëtuar nga Kukësi në Tiranë e më pas në Gramsh, ku ka ngarkuar në automjet një sasi të madhe fishekësh në vendin e quajtur diga e hidrocentralit të Banjës nga bashkëpunëtoret e tij, Zyli, Zisko e Plaku nga rrethi i Gramshit.
Armët u gjetën dhe u bllokuan në një postbllok policor të ngritur në hyrje të qytetit të Kukësit. Gjatë operacionit për arrestimin e tyre u bllokuan dhe sekuestruan 16 kuti metalike me 11520 fishekë model 56, kalibër 7.62 mm dhe një kuti metalike me 1260 fishkë pistolete kalibër 7.62 mm, një automatik model 56, 171 fishekë luftarakë mod 56 kalibër 7.62 mm, një dylbi dhe pjesë të tjera armësh, shula e gjilpëra. Panorama
