Shqipëria U-20 e drejtuar nga Ilir Biturku ka përfunduar ditën e sotme grumbullimin tre ditor, duke luajtur një ndeshje miqësore me ekipin e Kategorisë së dytë, “Partizani B”.
Në këtë grumbullim të parë të kësaj skuadre kombëtare, trajneri Biturku pati mundësi të ndjekë nga afër 18 lojtarët e grumbulluar nga kampionati shqiptar, duke parë gjendjen e tyre fizike, teknike dhe taktike gjatë seancave stërvitore, si edhe i ka testuar në ndeshjen e sotme me “Partizanin B” që është mbyllur me fitoren e Shqipërisë U-20, me rezultatin 3-0. Ndeshja është luajtur sot në kompleksin e ekipeve kombëtare në Kamëz dhe golat janë shënuar nga Oshafi dhe Cara në pjesën e parë, respektivisht në minutat 9-të dhe 23-të, për t’u vulosur nga Cara në minutën e 54-t, duke bërë që rezultati të mos ndryshojë deri në fund.
Në lidhje me këtë grumbullim dhe strategjinë e Kombëtares U-20, ka folur trajneri Ilir Biturku.
“Jam i kënaqur pas këtij grumbullimi treditor, mendoj se ka elementë edhe nga kampionati shqiptar, kemi lojtarë që luajnë në Kategorinë Superiore, në Kategorinë e Parë, ka lojtarë cilësorë. Sigurisht që një rezyme të Kombëtares U-20 do të bëjmë pas muajit mars kur lojtarët që vijnë nga jashtë të testohen dhe do të kuptojmë se kush do të jetë grupi i Kombëtares U-20 A. Në të njëjtën kohë do të jetë edhe ekipi U-20 B ku do të jenë lojtarët nga kampionati shqiptar të cilët njëherë në 15 ditë do të kenë ndeshje miqësore dhe grumbullime. Në prioritetin tonë janë lojtarët vendas, sepse shikojmë që kemi elementë cilësorë, por ajo që është risi është strukturimi i ri i ekipeve kombëtare” theksoi ai.
/a.rada
