Tubimet në dy vjetorin e tragjedisë së Tempit kanë paralizuar mbarë Greqinë dhe kanë rikthyer pamjet e protestave të dhunshme të një dekade më parë në kryeqytetin helen.
Në Athinë forcat e shumta të policisë u deshën të përdorin gaz lotsjellës për të shpërndarë turmat e revoltuara të demonstruesve që hodhën koktej molotov në drejtim të oficerëve dhe tentuan të mësyjnë në Parlament.
Oficerët e policisë zmbrapsën rebelët nga ana e poshtme e sheshit Sintagma në mes të flakëve, ndërsa me urdhër të kryetares së Kuvendit, në godinë për t’u mbrojtur hynë dhjetëra qytetarë të thjeshtë që ndodheshin në shesh ose ndjenin shqetësime nga gazi lotsjellës.
Protestuesit me kapuç e maska gjithashtu i vunë flakën kabinës së ndërrimit të oficerëve në Varrin e Ushtarit të Panjohur, ndërsa pas ndërhyrjes së policisë, incidentet vazhduan në rrugën Mitropoleos.
Nga incidentet raportohet për të lënduar. Nga personat që u ra të fikët në qendër të Athinës, dy u dërguan në Kryqin e Kuq dhe një në Spitalin Elpis, ndërsa rreth 40 protestues morën ndihmën e parë në infermierinë e Kuvendit.
Mbi 100-150 protestues që ndodheshin në vendin e ngjarjes dhe shkëmbimit të bombave molotov dhe gazit lotsjellës u ndihmuan nga policët.
Më herët, siç njoftoi ELAS, në kontrollet e kryera në qendër të Athinës para nisjes së mitingut për aksidentin e Tempit, u ndaluan 84 persona, nga të cilët 41 u arrestuan.
Episode dhune ka edhe në Selanik. Në afërsi të stacionit hekurudhor vijojnë incidentet, të cilat nisën kur një grup personash që ishin në përfundim të marshimit u nisën drejt policisë.
Këta persona kishin veshur kapuç dhe filluan të hidhnin koktej molotov, gurë dhe shishe ndaj policëve. Forcat e rendit u përgjigjën duke gjuajtur gaz lotsjellës.
