Këshilli i Ministrave ende nuk ka kthyer përgjigje për projektligjin e propozuar nga Erion Braçe “Për tatimin mbi vlerën e shtuar në bujqësi”.
Në Komisionin e Ekonomisë dhe Financave nuk munguan tonet e larta dhe reagimi i fortë i deputetit nismëtar të propozimit ligjor, shkruan A2.
“Është e turpshme që ministri i Financave nuk vjen të përballet me ne që flasim për një çështje që cenon 45% të qytetarëve. Kjo është një tallje skandaloze! Nuk lejoj askënd të vijë këtu që të tallet me punën e deputetëve”, tha Braçe.
Ai vuri në dukje se Ministria e Financave po tallej, teksa iu referua edhe “inatit të vjetër të ish-ministrit” (bëhet fjalë për Arben Ahmetajn në arrati), i cili, sipas deputetit, kishte frikë se mos Braçe bëhej ministër i Bujqësisë dhe e sulmonte.
“Ky shqetësim është krijuar nga ministri i Financave dhe është bërë në mënyrën më banale të mundshme, se ministri i asaj kohe (Arben Ahmetaj) kishte inat Braçen, se kishte frikë se unë bëhesha ministër i Bujqësisë. Kjo tallje që ndodh këtu është vetëm se këtë e kam propozuar unë, sepse po ta kishte propozuar ministri, do ishte miratuar direkt”, shtoi Braçe.
Madje ligjvënësi shkoi deri në termin se “kjo ishte puna e tij e fundit për sesionin”, duke shkaktuar edhe habi tek kolegët, duke qenë se politika është përfshirë edhe nga debati për listat e deputetëve.
Jorida Tabaku, deputete e PD, tha: “Më duket tallje, se kemi 6 vite që merremi me këtë çështje”.
Përfaqësues të ministrisë së Financave në komision pranuan se institucioni është në dijeni të problemeve që hasen në terren. Florian Semani, zv/ministër i Financave, deklaroi: “Por, duke qenë se ka disa shtojca të caktuara, do të kemi një qëndrim shumë shpejt dhe më pas të japim qëndrimin zyrtar të Ministrisë së Financave”.
Enkeleda Kuçi, drejtore e politikave tatimore në Ministrinë e Financave tha: “Ligji që kemi në fuqi është në përputhje të pjesshme me BE, një pjesë e mirë e dispozitave janë të harmonizuara plotësisht. Pikërisht për shkak të rëndësisë që ka ky sektor ne kemi kërkuar asistencën e BE-së, për qëllime të trajtimit sa më të mirë për një skemë të përshtatshme për sektorin e bujqësisë”.
Socialisti Braçe kërkon shfuqizimin e skemës së vitit 2018, të propozuar nga ish-ministri në arrati Arben Ahmetaj, për shkak se ka dëmtuar sektorin e bujqësisë. Aktualisht, sot një grumbullues kur blen produktin tek fermeri rimbursimin e TVSH-së e ka 0 për qind, ndërsa kur e blen në import rimbursohen 20 për qind.
Nisma u diskutua parimisht ne Komisionin e Ekonomisë, me dakordësinë e Ministrisë së Bujqësisë, më pas u pezullua nga KQZ, por u zhbllokua nga KAS.
