Ligjvënësit në Dhomën e Ulët të Parlamentit holandez kanë miratuar një rezolutë, përmes së cilës njihet si “gjenocid” masakra ndaj armenëve nga Perandoria Osmane më 1915, një vendim ky ka shkaktuar zemërim në Turqi. “Mocioni është pranuar”, ka thënë kryeparlamentarja Khadija Arib, pasi 143 ligjvënës votuan pro dhe vetëm tre kundër këtij propozimi, raporton REL
Ligjvënësit gjithashtu kanë kaluar edhe një rezolutë tjetër për dërgimin e përfaqësuesve qeveritarë në kryeqytetin armen, Jerevan, gjatë muajit prill, për të përkujtuar viktimat.
Këtë vendim të Parlamentit holandez e ka mirëpritur Ministria e Jashtme e Armenisë.
Por, lidhur me këtë vendim ka reaguar Ministria e Jashtme e Turqisë. Kjo ministri ka dënuar “fuqishëm” këtë vendim, duke thënë se një vendim i tillë nuk është ligjërisht i detyrueshëm apo i vlefshëm. Në deklaratën e ministrisë turke, thuhet se Qeveria holandeze ka deklaruar se ky vendim nuk do të bëhet politikë zyrtare e vendit.
Vrasjet dhe largimi i 1.5 milion armenëve nga turqit otomanë, është një temë shumë e ndjeshme për Armeninë dhe Turqinë. Armenia thotë se kjo është një prej shembujve të parë të gjenocidit në historinë moderne. Turqia kundërshton një pretendim të tillë, duke thënë se numri i armenëve të vrarë është më i vogël.
Të paktën 23 shtete, përfshirë Francën dhe Gjermaninë, i kanë njohur si “gjenocid” vrasjen e armenëve, përgatiti Koha. (b.an)
