Anija kërkimore “Oruc Reis” do të vazhdojë kërkimin për gaz në ujërat në juglindje të ishullit grek të Rodosit deri më 29 nëntor, konfirmoi qeveria turke.

Vendimi i Ankarasë për të kërkuar gaz në ujërat e diskutueshme mesdhetare ka shkaktuar tensione me Greqinë fqinje dhe Bashkimin Evropian.

Greqia dhe Turqia, të dy aleatë të NATO-s, pretendojnë të drejta në të njëjtën zonë të Mesdheut lindor.

Gjermania u përpoq të ndërmjetësonte bisedimet midis Ankarasë dhe Athinës, pas së cilës autoritetet turke tërhoqën për pak kohë anijen “Oruc Reis” përsëri në port, por në mes të tetorit, Turqia vendosi të vazhdojë kërkimin e gazit në ujërat e diskutueshme.

Athina akuzon Ankaranë për eksplorimin e paligjshëm të burimeve të energjisë në ujërat e ishujve grekë, ndërsa Turqia pretendon se po kryen kërkime në zonën e saj ekskluzive ekonomike.