Ambasada turke në Kosovë ka kërkuar nga Qeveria e Kosovës që të ndërmarr masa ndaj gazetarit, Berat Buzhala për komentet e tij në Facebook rreth grusht shtetit në Turqi, raporton Reuters.
“Ftoj qytetarët e Republikës së Kosovës që janë në pushime në Turqi që të bashkohen me ushtrinë”, kishte shkruar Buzhala, duke vendosur edhe një shenjë emocionale të Facebook që nënkupton se komenti nuk ishte serioz, transmeton Koha.net.
“Ky është grusht shteti më serioz që nga krijimi i Facebookut”, kishte shkruar gjithashtu Buzhala.
Reuters shkruan se Turqia është një nga mbështetësit më të mëdhenj të Kosovës që nga shpallja e pavarësisë, dhe kompanitë e saj e udhëheqin aeroportin, shpërndarjen e energjisë elektrike dhe ndërtimi i dy autostradave me vlerë rreth 2 miliardë dollarëve.
Më 20 korrik Ambasada e Turqisë në Prishtinë i ka dërguar një notë Ministrisë së Jashtme të Kosovës duke i kërkuar që të marr masa ndaj gazetarit në fjalë.
“Ministria duhet të sigurohet që do të ndërmerren masat e duhura në lidhje me këtë person në pajtueshmëri me ligjin”, thuhet në notën e dërguar nga Ambasada turke, e cila kishte dërguar edhe komentet e Buzhalës të bëra në Facebook.
“Në notën e dërguar nga ambasada, një kopje të së cilës e ka parë Reutersi, gjithashtu është cituar edhe një ligj i ri i miratuar në Kosovë, i cili i ndalon qytetarët e saj që të bashkohen në konfliktet e armatosura jashtë vendit”, shkruan Reuters.
Ambasada ka thënë në notën e saj se ligji përcakton që komentet nga persona të tillë si Buzhala “duhet të dënohen me burg për gjashtë deri në pesë vjet”. (b.an)
