Numan Kurtulmush, zëvendëskryeministër i Turqisë, ka lënë të premten porosinë në Prishtinë se shteti që ai përfaqëson është i interesuar ta çojë në një stad tjetër bashkëpunimin me Kosovën.
Ka folur për dimensione të reja bashkëpunimi.Qëndrimin e ka shprehur në takimet që ka zhvilluar me autoritetet më të larta të shtetit, shkruan Koha Ditore.
Për nevojën e avancimit të marrëdhënieve ka folur në takimin me kryeparlamentarin Kadri Veseli.Në anën tjetër, presidenti Thaçi ka theksuar se marrëdhëniet mes Kosovës dhe Turqisë janë të shkëlqyera dhe se mes dy shteteve nuk ka çështje të hapura.
“Kosova ka përthithur kulturën islame në rrënjë”
Numan Kurtulmush, zëvendëskryeministër i Turqisë gjatë qëndrimit të tij në Kosovë, ka lidhur ngushtë kulturën dhe gjeografinë islame me Kosovën.
Kurtulmush, sipas Agjencisë Anadolu, ka thënë se Kosova është një vend që ka përthithur kulturën islame në rrënjë dhe se është pika më e rëndësishme e gjeografisë islame në perëndim, transmeton Koha.net.
“Kosova është vend evropian dhe një vend që e ka përthithur kulturën islame në rrënjë. Duke qenë kështu, Kosova është pika më e rëndësishme e gjeografisë islame në perëndim”, ka thënë Kurtulmush, duke shtuar se Kosova është një vend ku islami e ka paraqitur veten para Evropës me fytyrën e tij të mirë dhe paqësore.
Zëvendësi i Ahmet Davutoglus, ka thënë se dëshiron sa më shpejt njohjen e Kosovës dhe liberalizimin e vizave, sepse sipas tij, njohja e Kosovës do t’i jepte botës islame fuqi. Ai, gjithashtu, ka thënë se do të kërkojë nga vendet myslimane që të njohin sa më shpejt Kosovën.