Turqia ka refuzuar të mbështesë një përmirësim prej 27 miliardë eurosh të rrjetit të tubacioneve të karburantit ushtarak të NATO-s, sipas dy diplomatëve të aleancës, ndërsa po bën një përpjekje të fundit për të nxjerrë lëshime nga marrëveshja.
Ankaraja refuzoi të miratonte marrëveshjen shumëdekadëshe gjatë një takimi të 32 të dërguarve të aleancës javën e kaluar, pavarësisht se vendet arritën një kompromis të përkohshëm këtë muaj, përveç nëse projektet turke në marrëveshje marrin financim prioritar, thanë dy diplomatët.
Vendet e NATO-s janë aktualisht në bisedime të rëndësishme për të finalizuar marrëveshjen, e cila do të zgjerojë rrjetin e tubacioneve të aleancës prej 10,000 kilometrash të epokës së Luftës së Ftohtë nga Evropa Perëndimore në vendet anëtare më të reja të aleancës në lindje dhe veri. Ky veprim është pjesë e përpjekjes më të gjerë të NATO-s për t’u përgatitur për një luftë të mundshme me Rusinë.
Në samitin e liderëve të NATO-s të këtij muaji në Ankara, Sekretari i Përgjithshëm i Aleancës Mark Rutte e përshëndeti një marrëveshje si të afërt.
“Aleatët po ndërmarrin një hap historik për të përmirësuar zinxhirin e furnizimit me karburant të NATO-s për të siguruar që forcat tona të kenë furnizimet me energji që u nevojiten”, u tha ai gazetarëve .
“Ndërsa aleatët vazhdojnë të finalizojnë detajet, ne e dimë se ky investim prej 27 miliardë eurosh do të modernizojë infrastrukturën tonë ekzistuese të magazinimit dhe shpërndarjes së karburantit”, shtoi më te ai.
Pavarësisht kësaj, Ankaraja ka lënë të kuptohet se nuk do ta miratojë propozimin nëse 21 projektet në territorin turk nuk merren në konsideratë për financim të përshpejtuar, thanë diplomatët. Shtytja e Ankarasë pasqyron faktin se pjesa më e madhe e financimit do të shpërndahet në pesë vitet e para të reformës.
Vendet e NATO-s më parë nuk kishin rënë dakord për kostot e larta të marrëveshjes, e cila nga diplomatët ishte shpallur si projekti më i shtrenjtë i financuar ndonjëherë nga aleanca, ndërsa disa të tjera u shqetësuan për faktin se ajo do të bllokonte projektet e karburantit për dekada të tëra. Kryeqytetet më vonë ranë dakord të hiqnin dorë nga kundërshtimi i tyre ndaj skemës, ndërsa shtetet e krahut lindor në veçanti lobuan fort për një marrëveshje të shpejtë.
Lëvizja e Ankarasë rrezikon të vonojë një marrëveshje për zgjatjen e tubacionit deri në shtator, kur ambasadorët e NATO-s do të mblidhen përsëri pas pushimeve të verës, tha një nga diplomatët.
