Nga Flogert Muça/
Është bërë e udhës në politikën shqiptare që të sulmohet drejt pikave të dobëta, për ta “dërrmuar” kundërshtarin. Një strategji e njohur padyshim edhe në botë dhe që në disa e raste edhe funksionon. Politika e pamëshirshme, sjell edhe goditje hera herës poshtë brezit, e për këtë hyn në punë media dhe opinion-bërësit. Të cilët në një pjesë të madhe të rasteve janë zëdhënës politikë të partisë ku i lidhen interesat. Deri në pikën sa marrin përsipër të godasin edhe poshtë brezit ndaj kundërshtarit, pa patur ndonjë argument, po thjeshtë dhe vetëm se duhet thënë diçka e keqe ndaj tij. Fatkeqësisht publiku rri indifferent.
Sa më lart, lexova sot një shkrim nga një opinion-bërës, të cilit pasi nuk i ka mbetur asgjë për të thënë kundër Edi Ramës, ishte kapur me djalin e vogël të tij, Zahon. I cili së bashku me të atin kryeministër po pushon në Jug të vendit. I cili po argëtohet në fund të fundit me të atin. I cili nuk ka vrarë asnjë njeri, nuk ka trafikuar kurrë armë. Nuk është as personazh Hollivudi si trafikant. Nuk ka marrë kurrë para të “Stadiumi Dinamo” për lëndët narkotike.
Zaho nuk ka bërë asnjërën nga këto poshtërsi.
E dini çfarë “krimi” ka bërë Zaho? Ka dalë në foto më të atin, e ky i fundit i ka publkuar 3 prej tyre në Facebook-un e tij personal. As në Facebook-un e kryeministrisë, askund tjetër.
Për këtë, Zaho-ja sot është marrë e shkarravitur nga lapsat e baltës. Me synimin për të dëmtuar kryeministrin Rama, burra me mjekër sot kanë marrë lapsin e kanë tentuar të bëjnë pis një fëmijë. Të cilit as fytyrën s’ja njeh, por i mjafton mllefi ndaj të atit për ta përdorur.
Pikërisht është ai që ka shkruar atë artikull që në fakt ka përdorur Zahon për t’i rënë kundërshtarit të tij politik, e kjo është më e pakta, e turpshme. Sepse politika e Berishës (i biri i të cilit sot burrë me gruan e dytë ka kapur Hollivudin si trafikant armësh e mbart mbi vete plot akuza mediatike të cilat s’janë puna jonë ti gjykojmë) e tillë mbetet në çdo kohë.
Por Zaho është 2 vjeç, krejt i pafajshëm. Zaho nuk e di ku bie Gërdeci akoma, ai nuk e di akoma se kush i ka vrarë 26 të pafajshëm aty, madje dhe moshatarët të tij. Zaho nuk zgjedh Maldivet që kushtojnë sa “i biri tëmën” për të pushuar, siç bën Zeni me gruan e tij dytë, por jugun e Shqipërisë. Duke e promovuar madje edhe në rrjetet sociale.
Ndaj Edi Ramës, pushka top ju bëftë çdo gazetari, sepse është kryeministër e duhet të mbajë përgjegjësi për punët e vendit. Nuk kam nërmend të shkruaj një rresht për të mbrojtur Edi Ramën, por, larg fëmijëve të pafajshëm! Larg 2-vjeçarit i cili për fat të mirë nuk e kupton akoma se ç’masakër bëhet mbi të vetëm se i ka qëlluar të jetë i biri i kryeministrit.
Edi Rama mund të jetë kryeministri më i keq, por ky nuk mund të jetë kurrësesi shkak për tu marrë me djalin e tij, i cili është vetëm 2 vjeç.
