Sot ambasadori rus në Beograd, Alexander Botsan-Kharchenko ka thënë se kërkesa e Prishtinës që Serbia ta njohë Kosovën është “marrëzi”. Ndaj kësaj deklarate, ka reaguar kryetari i AKR-së, Behgjet Pacolli, i cili e ka quajti arrogant Kharchenkon duke thënë se është plot me urrejtje dhe frustrim ndaj Kosovës.
“Një diplomat nga një shtet i madh si Rusia, i cili pretendon se radhitet me shtetet e civilizuara dhe demokratike, duhet të jetë i edukuar, i mençur, i urtë dhe të sillet sipas kodit diplomatik.
Ambasadori i Federatës Ruse në Beograd ka demonstruar që nuk posedon dhe nuk i përmbahet asnjërës dhe si i tillë ai është shumë arrogant, plot urrejtje dhe frustrim ndaj Kosovës dhe shqiptarëve, edhe pse ishte bashkëpunëtor i ngushtë i Presidentit Ahtisaari që ka përshkruar Dokumentin përfundimtar për Sekretarin e Përgjithshëm të Kombeve të Bashkuara për Statusin e Republikës se Kosovës.
Fjalori i tij (para studentëve në Beograd) është aq i poshtër sa çdo shef normal në Moskë do ta pushonte nga funksioni. Turp për ju Ambasador Kharchenko!”, shkruan Pacolli.
