Kryetari i PD-së Sali Berisha sot në 6 shkurt ka zhvilluar takime me qytetarët në njësinë 8 dhe 10 në Tiranë.
Berisha u shpreh se qeveria e Ramës është antikombëtare. Sipas tij, shpresa e vetme e vendit është Partia Demokratike.
“Sot organizata kriminale voton kundër interesave jetike të qytetarëve shqiptarë. Kjo qeveri rrezikon të zhbëjë integrimin europian të Shqipërisë. Ju keni 13 vjet që sakrifikoni e që përçmoheni e nënvlerësoheni. Kjo është qeveri antishqiptare dhe duhet të ngrihemi për interesin kombëtar. Enver Hoxha ishte gjakësor, kishte kryer krime monstruoze e nuk e lëshonte karrigen e tij. Kurse sot, Edi Rama edhe BE-në do që ta shkëpusë, për interesin e tij dhe për karrigen personale. Në këtë situatë shpresa e vetme jemi ne. Kjo qeveri nuk ka fituar zgjedhjet, por ka fituar farsa”, tha Berisha.
Berisha u shpreh se kjo qeveri di vetëm të plaçkisë dhe asgjë tjetër. Ai shtoi se PD-ja është shpresa e vetme e shqiptarëve, që gjërat të ndryshojnë në vend.
“Kjo qeveri di vetëm të plaçkisë. Ne jemi në misionin më të rëndësishëm që kemi pasur që nga viti 1991 e deri më sot. Është misioni më i vështirë, por më i sigurti drejt fitores. Kur menduan se na arkivuan në histori, ne u ngritëm dhe jemi sot forca politika e dytë me këto përmasa. Në Europë, më e fuqishme se ne është partia Fidesz në Hungari dhe pastaj jemi ne. Ju kemi qëndruar të vërtetave, që e kanë bërë këtë parti të pamposhtur. Pati parti të tjera në zgjedhjet e fundit dhe prapë ne u votuam më shumë nga partitë opozitare. Kjo do të thotë se shpresën shqiptarët e kanë tek ne. Shpresa është Partia Demokratike e Shqipërisë, është opozita shqiptare. Jemi në rrethana të tilla që vota kthehet në drogë e krim, jemi në rrethana ku miliardat e vjedhura kthehen në votë. Ne jemi tashmë në kilometrin e fundit. Vijmë në këtë kilometër të fundit, pasi kemi faktuar se Rama nuk bën zgjedhje, por bën farsë”, deklaroi ai.
Berisha përmendi sërish protestën e 10 shkurtit, duke thënë se do jetë dita e kryengritjes paqësore të Partisë Demokratike.
“Kjo betejë nuk është betejë për një parti, është betejë për ekzistencën e kombit, për të ardhmen e Shqipërisë dhe shqiptarëve”, përfundoi Berisha.
