Shqipëria vijon të regjistrojë shifra në rritje të turizmit dhe për këtë vit.
Italia e ndjekur nga Kosova, përbën numrin më të madh të hyrjeve në Shqipëri. Krahasuar me një vit më parë, vendi ynë priti rreth 297 mijë hyrje më shumë, me një rritje vjetore prej 6.2%. Gjatë gjashtëmujorit të parë të vitit 2026 në Shqipëri u regjistruan 5 milionë shtetasve të huaj.
Nga Kosova u regjistruan mbi 1.7 milionë hyrje, ose rreth një e treta e totalit, me rritje 3.8% në raport me vitin e kaluar. Të marra së bashku, Kosova dhe Italia përbëjnë afërsisht 46% të të gjitha hyrjeve.
Një tjetër rritje e pazakontë u regjistrua nga Malajzia. Hyrjet nga ky vend u shtuan nga 2,429 në 6,508, me një zgjerim vjetor prej 167.9%.
Rritje të forta pati gjithashtu nga Lituania, me 81.4%, India me 78.3%, Finlanda me 57.6%, Izraeli me 49.5% dhe Polonia me 44.8%. Edhe Spanja dhe Ukraina shënuan rritje mbi 40%.
Në anën tjetër, rënia më e madhe u regjistrua nga Arabia Saudite, me 48.2%. Më pak hyrje pati gjithashtu nga Kina, Gjermania, Zvicra, Austria dhe disa vende të rajonit.
Rreth 116 mijë hyrje u regjistruan për qëllime biznesi dhe profesionale, ndërsa mbi 166 mijë ishin udhëtarë transit.
Fluksi i vizitorëve ditorë u rrit ndjeshëm me afrimin e sezonit. Nga rreth 22 mijë në janar, numri i vizitorëve ditorë arriti në mbi 53 mijë në prill dhe kulmoi në maj me 86,321 hyrje. Në qershor u regjistruan mbi 72 mijë, më shumë se trefishi i nivelit të janarit.
