Si kurrë më parë, sezoni veror në Shqipëri po përballet me protokollet e diktuara nga pandemia globale. Për të folur rreth risive, masave dhe pritshmërive, emisioni “Java në RTSH” kishte të ftuar në studio kryebashkiaken e Shkodrës, Voltana Ademi. Ndërkohë që përmes lidhjeve direkte kreu i bashkisë Sarandë dhe ai i Lezhës komentuan situatën dhe sezonin turistik për panelin e emisionit.
Për Voltana Ademin, Shkodra pret kryesisht turistë që vijnë në rrugë tokësore, si nga pikat kufitare të Malit të Zi, apo shqiptarët e Kosovës dhe Maqedonisë. Ajo tha se lëvizshmëria është një domosdoshmëri për të pasur një sezon të suksesshëm.
“Ne fluksin kryesor e presim nga shqiptarët e Kosovës. Fatkeqësisht Shqiëpria nuk ka një plan për rimëkëmbjen e biznesit të turizmit, sikurse vendet e tjera. Sot ne shohim se shumë operatorë i kanë larguar të punësuarit e tyre. Ndërkohë që nuk kemi ende një protokoll për masat që duhet të merren gjatë periudhës së plazhit, sikurse mungojnë edhe trajnimet e stafeve të hotelerive apo restoranteve” – tha Ademi në studion e “Java në RTSH”.
Ajo shtoi se Bashkia e Shkodrës ndërkohë ka nisur punën për riparimet në infrastrukturë si dhe pastrimin e plazheve, siç është ai i Velipojës.
Ndërkohë, për kryebashkiakun e Sarandës, fakti që kjo bashki është një zonë e gjelbër e ka favorizuar për të qenë një hap përpara.
Adrian Gurma tha se institucioni që ai drejton ka dëgjuar kërkesat dhe opinionet e operatorëve turistikë dhe i ka përcjellë ato në instancat shtetërore.
“Saranda këtë vit do të ketë përmirësime sa i përket furnizimit me ujë dhe energji elektrike. Madje në Sarandë shohim edhe një ‘bum’ kërkesash nga të huajt për të blerë apartamente. Dua të shtoj se prej tre javësh fundjavat në Sarandë janë si fundjava normale. Fakti që jemi një bashki e gjelbër duket se ka bërë që të jemi një hap përpara bashkive të tjera në këtë aspekt” – tha kryebashkiaku Gurma.
Për Pjerin Ndreun, Bashkia e Lezhës ka nisur konsultimet me operatorët turistikë. Ai tha se bashkitë e vendit janë ende në pritje të një Vendimi nga Këshilli i Ministriave për formatin e pushimeve dhe protokollet e sigurisë që duhen ndjekur.
“Është e natyrshme që pritshmëritë tona të mos jenë ato që kishim në fillim të vitit, kur nuk ishte shpallur ende pandemia. Por dua t’ju siguroj se plazhet e Lezhës do të jenë absolutisht të pastra. Dihet që fluksi kryesor është në Shëngjin, Rana e Hedhun dhe Kune. Ndaj krahas investimeve në infrastrukturë, vëmendje po marrin kryesisht këto plazhe. Për shembull në Kune sivjet do të kemi një shëtitore krejtësisht të re” – tha Ndrei.
Kryebashkiaku i Lezhës tha se institucioni që ai drejton një vëmendje të madhe i ka kushtuar edhe promovimit të turizmit përmes materialeve filmike, spoteve etj.
