Një turiste franceze 41-vjeçare humbi jetën të dielën pranë plazhit të Balosit, në rajonin e Chanias në Kretë, pasi u rrëzua gjatë një ecjeje në temperatura të larta dhe nën diell të fortë.
Gruaja kishte shkuar në zonë së bashku me partnerin e saj. Çifti la makinën në një parking në Falasarna dhe vijoi në këmbë drejt Balosit, duke ndjekur një shteg të vështirë dhe me terren të thyer.
Pavarësisht tabelave paralajmëruese që ndalonin hyrjen në zonë, dy turistët vijuan rrugën. Gjatë kthimit, rreth një kilometër larg parkingut, 41-vjeçarja humbi ndjenjat për shkak të dehidratimit të rëndë.
Partneri i saj u kthye te makina për të marrë ujë dhe telefonoi numrin e emergjencës 112 për të njoftuar autoritetet.
Në zonë u dërguan zjarrfikës nga stacioni i Kissamos dhe një ekip i EMODE, të cilët e gjetën gruan pa ndjenja dhe nisën menjëherë reanimimin kardiopulmonar. Përpjekjet për ta shpëtuar vazhduan edhe nga ekipet e emergjencës së EKAB, të cilat e transportuan drejt spitalit.
Megjithatë, 41-vjeçarja ndërroi jetë gjatë transportit.
Autoritetet greke kanë paralajmëruar se temperaturat e larta dhe ekspozimi i drejtpërdrejtë ndaj diellit e bëjnë veçanërisht të rrezikshme ecjen në shtigje të gjata dhe të vështira.
Shërbimi i Zjarrfikësve u ka bërë thirrje turistëve dhe banorëve të tregojnë kujdes të shtuar dhe të respektojnë udhëzimet e sigurisë.
