Një turist gjerman është rrëzuar teksa po eksploronte alpet e Valbonës dhe për pasojë ka dëmtuar këmbën.
Përmes një njoftimi, Policia bën të ditur se menjëherë pasi janë lajmëruar dhe pas 2 orë kërkimesh, kanë lokalizuar dhe i kanë ardhur në ndihmë shtetasit gjerman.
Po ashtu, në njoftimin e Policisë bëhet e ditur se turisti në fjalë ndodhet në spitalin e Tropojës, fatmirësisht jashtë rrezikut për jetën.
Njoftimi i Policisë:
Valbonë-Rreth orës 13:15, Salla Operative e Komisariatit të Policisë Tropojë ka marrë njoftim se në vendin quajtur “Maja e Rosit”, Valbonë, një shtetas gjerman(turist) duke eksploruar alpet e Valbonës ishte rrëzuar dhe për pasojë kishte dëmtuar këmbën.
Menjëherë pas marrjes së njoftimit, shërbimet e Komisariatit të Policisë Tropojë së bashku me ekipin mjekësor të spitalit të Tropojës, janë nisur drejt adresës së dhënë.
Pas dy orësh kërkimesh shërbimet e Policisë, lokalizuan turistin gjerman 68 vjeçar, i cili u transportua nga shërbimet e Policisë deri në rrugën e makinave dhe më pas u transportua drejt spitalit me autoambulancë.
Turisti ndodhet në Spitalin e Tropojë, jashtë rrezikut për jetën.
Drejtoria Vendore e Policisë Kukës është e angazhuar maksimalisht në përmbushje të detyrave për garantimin e rendit dhe sigurisë, parandalimin dhe goditjen e paligjshmërive dhe në ndihmë të qytetarëve, vizitorëve dhe turistëve në rast nevoje.
