Turi veror “Verë dhe Portokalle” vijoi rrugëtimin në Tepelenë, duke sjellë pranë publikut të këtij qyteti humorin që po prezantohet gjatë verës në zona të ndryshme të vendit.
Në skenën e vendosur në sheshin qendror performuan aktorët e njohur të Top Channel dhe personazhet që prej vitesh ndiqen nga mijëra shqiptarë çdo të diel. Interpretimet e tyre i dhuruan qytetit një mbrëmje të mbushur me të qeshura dhe emocione.
Sheshi u mbush nga qindra banorë të Tepelenës dhe vizitorë të ardhur prej zonave përreth për ta parë spektaklin nga afër. Skeçet u shoqëruan me duartrokitje, ndërsa batutat dhe personazhet e njohur krijuan një atmosferë festive, duke e argëtuar publikun përgjatë gjithë mbrëmjes.
Falë spontanitetit dhe energjisë karakteristike, trupa e “Verë dhe Portokalle” realizoi një tjetër natë të suksesshme, ndërsa Tepelena u shndërrua në një skenë të madhe humori dhe argëtimi për të gjitha moshat.
