Shqipëria është kampione në çiklizëm, teksa në turin ballkanik tre vendet e para janë zënë nga sportistët shqiptarë.
Pa asnjë surprizë, ashtu siç edhe pritej, vendin e parë e zuri kampioni në fuqi i këtij turi, Eugert Zhupa. Me kohën e tij 4.01.40, Zhupa la pas vetes së tij rivalët e tjerë, Iltjan Nikën dhe Redi Halilaj, me rreth tre minuta më shumë.
FITUESIT
1 EUGERT ZHUPA 4.01.40
2 ILTJAN NIKA 4.04.15
3 REDI HALILAJ 4.04.16
Gara ka qenë e fortë dhe deri në ngjitjen e dytë të majës së Kërrabës ku sportistët kanë qenë afër me njëri-tjetrin, por pikërisht gjatë ngjitjes dhe më pas në zbritje, kampioni Zhupa ka bërë diferencën, duke e prerë finishin i pari dhe i pashqetësuar nga askush.
Kjo garë ishte e gjatë 170 km dhe përfshinte, maloren dhe dishezën, ashtu edhe rrugën e shtruar, duke i dhënë mundësinë sportistëve të tregojnë veten e tyre në të gjitha terrenet.
Duhet thënë se shumë sportistë nuk e kanë përfunduar dot këtë garë, duke mos e prerë dot finishin, për shkak të lodhjes dhe problemeve që kanë pasur me biçikletat e tyre.
Ky aktivitet ka qenë një sukses për Shqipërinë dhe vetë fakti se në pod u ngjitën tre shqiptarë, tregon edhe cilësinë e tyre përballë rivalëve ballkanikë. Gjithçka shkoi shumë mirë në këtë garë, me masat e duhura që kishte marrë policia, ku nuk pati asnjë problem gjatë rrugës./BW/a.k
