Qymyr, krom, bujqësi, fason, Call Center e së fundmi ndërtim e shitblerje pronash, bashkë me turizmin. Në dekadën e katërt të tranzicionit, ekonomia shqiptare po rezulton e paaftë për të përmirësuar e aq më pak për të ndryshuar veten. Së paku në tre dekadat e fundit ekonomia ka ecur në të njëjtat shina, duke kopjuar veten ndërsa politikat e ndërmarra kanë tentuar kryesisht përfitime afatshkurtra. Por sot vendi ka nevojë për hapa konkretë drejt modelimit të ekonomisë në drejtim të digjitales që ndërton bazën e duhur për brezat e ardhshëm.
“Pilotimet kanë qenë shumë konkrete, ne kemi një nga projektet më të suksesshme në gjashtë muaj për agroturizmet, mbi digjitalizimin dhe transformimin e tyre financiar por edhe nga ana tjetër dhe në mënyrën e të bërit biznes sepse po shikonim që turisti e kërkonte. Nga 349 agroturizme të regjistruar, të 349 morën një edukim financiar, orën edukimet e tyre për sa i përket ekonomisë qarkulluese, për t’i kthyer në vlera të mira për biznesin e tyre”, thotë për A2 CNN sipërmarrësja Fabiola Duro.
Për aktorë të tregut, rimodelimi i ekonomisë kombëtare lejon që secili kapital të ketë një rol më të veçantë brenda kornizës së kontributit të tij në rritjen ekonomike. Kjo me kushtin që vendi të largohet nga e vjetra e prapambetur dhe të orientohet te e reja e përparuar që prodhon.
“Shqipëria është një destinacion fantastik turistik. Ne zgjedhim si projektin tonë mbështetjen për të nxitur më shumë pagesa digjitale për ta bërë më të lehtë mbarëvajtjen e biznesit. Ne u fokusuam kryesisht në turizëm por edhe edukimi është shumë i rëndësishëm”, thotë për A2 CNN sipërmarrësja Ana Draskovic.
Shqipëria duhet të zhvillojë një ekonomi që prodhon pasuri dhe mirëqenie për të gjithë, lehtëson pabarazinë, promovon konkurrencën dhe punon në një mjedis të shëndetshëm biznesi. Po që kjo të arrihet, politikat qeveritare dhe biznesi duhet ta vlerësojnë edhe më shumë individin, si kapitalin më të çmuar në një shoqëri.
“Me edukimin financiar është bërë një punë e mirë rreth 30 vite. Interesi vazhdon të jetë i madh sepse perceptimi ndoshta për të tilla koncepte shumë shpesh nga një pjesë e mirë e popullatës është pak e vështirë që të përthithet, megjithatë ne kemi shumë shpresa që brezi i ri tashmë është më familjar me produktet e teknologjisë”, thotë për A2 CNN sipërmarrësja Heriola Spahiu.
Ekonomia u rrit me 4.06 për qind në tremujorin e dytë të vitit. Ky është niveli më i lartë i dy viteve të fundit, dhe ndjeshëm më pozitiv se një vit më parë. (grafik 1) Kontributin kryesor në këtë ecuri e dha sektori i ndërtimi bashkë me turizmin.
