Mund të duken si shqetësime të zakonshme, por në disa raste mund të jenë sinjale që meritojnë vëmendje.Tumoret e gjakut përfshijnë një grup të gjerë sëmundjesh, mes tyre leucemitë, limfomat dhe mielomat.
Ato prekin qelizat e gjakut, palcën e kockave ose sistemin imunitar, të cilat mund të kenë ecuri shumë të ndryshme dhe jo gjithmonë shfaqin shenja të qarta në fazat e para.
Ndryshe nga disa lloje të tjera kanceri, shenjat e para të tumoreve të gjakut shpesh janë të paqarta dhe mund të ngatërrohen lehtësisht me probleme të zakonshme shëndetësore.
Shenja të paqarta, por pa panik
Pesë familjet kryesore janë leucemitë, limfomat, mielomat, sëmundjet mieloproliferative kronike dhe sindromat mielodisplastike.
Disa prej tyre zhvillohen me shpejtësi dhe kërkojnë trajtim të menjëhershëm, ndërsa të tjera kanë një ecuri kronike dhe përparojnë gradualisht.
Pikërisht për shkak se simptomat mund të jenë të ngjashme me ato të shumë sëmundjeve të tjera, specialistët theksojnë se shfaqja e tyre nuk duhet të shkaktojë panik. Megjithatë, nëse simptomat janë të reja, të vazhdueshme dhe të pashpjegueshme, duhet të konsultohet mjeku.
Lodhje e fortë dhe e vazhdueshme
Një nga shenjat më të zakonshme në fazat e para është lodhja e theksuar.
Bëhet fjalë për një lodhje të re, që nuk largohet me pushim dhe që nuk ka një shkak të dukshëm. Personi mund të ndiejë dobësi të vazhdueshme dhe një rënie të pazakontë të energjisë.
Te sëmundjet hematologjike, kjo mund të lidhet me aneminë, e cila ul furnizimin e indeve me oksigjen. Mund të shkaktohet gjithashtu nga proceset inflamatore të lidhura me vetë sëmundjen.
Nëse një lodhje e pashpjegueshme vazhdon për më shumë se dy javë, këshillohet konsultimi me mjekun.
Temperaturë, sidomos në mbrëmje ose gjatë natës
Një tjetër shenjë që mund të shfaqet është temperatura ose një temperaturë e lehtë që përsëritet për javë të tëra, veçanërisht pasdite dhe gjatë natës.
Në disa raste, temperatura mund të jetë pasojë e një infeksioni, pasi disa sëmundje hematologjike dobësojnë mbrojtjen imunitare të organizmit.
Kur temperatura kalon 38°C dhe shoqërohet me dhimbje fyti, kollë, probleme urinare apo shqetësime gastrointestinale, mund të ketë një infeksion që kërkon vlerësim mjekësor.
Djersitje e fortë gjatë natës
Zgjimi gjatë natës me rrobat dhe çarçafët të lagur nga djersa, në mënyrë të përsëritur dhe pa një arsye të dukshme, është një tjetër shenjë që duhet vlerësuar.
Sipas specialistëve, kjo mund të lidhet me substanca të çliruara nga qelizat tumorale, të cilat ndikojnë në temperaturën e trupit dhe në përgjigjen inflamatore.
Dhimbje të pashpjegueshme në kocka
Dhimbjet e papritura në kocka, shpinë ose kyçe, veçanërisht kur nuk kanë një shkak të dukshëm dhe nuk qetësohen me qetësuesit e zakonshëm, kërkojnë vëmendje.
Në disa sëmundje hematologjike, qelizat tumorale grumbullohen në palcën e kockave, duke shkaktuar zgjerimin e saj dhe dëmtimin e strukturës së kockave.
Dhimbjet mund të shfaqen veçanërisht në kafkë, rruaza, brinjë dhe legen.
Rënie e papritur në peshë
Një humbje e pashpjegueshme në peshë, veçanërisht kur shoqërohet me humbje të oreksit, mund të jetë shenjë e shumë sëmundjeve, përfshirë edhe disa sëmundje hematologjike.
Ky fenomen mund të lidhet me substanca të prodhuara nga qelizat tumorale, të cilat ndikojnë në metabolizmin dhe oreksin.
Mavijosje pa goditje
Mavijosjet që shfaqen vazhdimisht pa pasur goditje apo trauma janë një tjetër shenjë që nuk duhet anashkaluar.
Mund të shfaqen edhe pika të vogla të kuqe në lëkurë, të njohura si purpura. Këto mund të lidhen me një ulje të ndjeshme të numrit të trombociteve.
Pikërisht për këtë arsye, një ndryshim i pazakontë në lëkurë mund të jetë sinjal për të kryer kontrolle të mëtejshme.
Gjakderdhje dhe infeksione të përsëritura
Problemet e përsëritura në gojë, si plagët, inflamacionet, gingiviti apo absceset, si dhe dëmtimet e lëkurës që shërohen me vështirësi, mund të lidhen me dobësimin e sistemit imunitar.
Në këto raste, organizmi mund ta ketë më të vështirë të përballet me mikroorganizmat dhe infeksionet mund të përsëriten më shpesh.
Nyje limfatike të zmadhuara
Zmadhimi i nyjeve limfatike në qafë, sqetulla ose në zonën e ijeve, edhe kur nuk shoqërohet me dhimbje, është një tjetër shenjë që duhet vlerësuar.
Megjithatë, kjo nuk do të thotë automatikisht se bëhet fjalë për kancer. Nyjet limfatike mund të zmadhohen edhe si reagim normal i sistemit imunitar ndaj një infeksioni.
Nëse zmadhimi vazhdon dhe nuk largohet vetë pas rreth një muaji, këshillohet konsultimi me mjekun.
Zmadhimi i shpretkës, nga ana tjetër, mund të shkaktojë ndjesi ngopjeje të shpejtë, presioni ose rëndese në pjesën e majtë të barkut.
Kruarje e fortë në të gjithë trupin
Një kruajtje e re, e fortë dhe e vazhdueshme, veçanërisht kur përkeqësohet gjatë natës dhe shfaqet në të gjithë trupin pa ndonjë problem të dukshëm në lëkurë, është një tjetër simptomë që mund të kërkojë vlerësim.
Disa lloje të tumoreve të gjakut, veçanërisht limfomat, mund të shoqërohen me këtë simptomë.
Mesazhi kryesor i specialistëve është i qartë: këto simptoma nuk nënkuptojnë domosdoshmërisht praninë e një tumori. Por nëse janë të reja, të forta, të vazhdueshme dhe pa një shkak të qartë, është e rëndësishme të konsultoheni me mjekun dhe të mos e shtyni kontrollin.
Artikull i përshtatur nga Corriera della Sera
