Kryeministri i Greqisë Aleksis Tsipras nuk do të vijë në Shqipëri në 27 maj për të marrë pjesë në samitin e nivelit të lartë të kryeministrave të rajonit në kuadër të SCEEP. Në vend të tij do të jetë zvministri i jashtëm Niko Huntis. Lajmi bëhet i ditur nga gazeta greke “Kathimerini” e cila thekson se pas bojkotimit të Ministritë të Jashtëm grek, Nikos Kotzias në takimin e ministrave të Jashtëm të Procesit të Europës Juglindore që u mbajt në Tiranë më 22 dhe 23 maj, tashmë është radha e shefit të qeverisë greke.
Dhe sipas “Kathimerinit” nuk ka më asnjë dyshim se marrëdhëniet mes Tiranës e Athinës janë në nivelin më të ulët.
Tensionet kanë arritur kulmin në periudhën e parë të 2015 me hapjen nga qeveria shqiptare të çështjes së kërkimit të hidrokarbureve në detin Jon dhe Greqinë e Veriut.
Sipas “Kathimerinit” zgjidhja e mosmarrëveshjeve për kufirin detar mund të arrihet përmes disa opsioneve, dhe madje gazeta nuk përjashton padinë në Gjyqin e Hagës.
“Shqipëria pretendon se Greqia me programin e kërkimeve për naftë në detin Jon, të shpallur në qershor ka shkel ujërat territorial shqiptare në bllokun 5 ku Tirana planifikon kërkime gjatë javëve të ardhshme. Kjo do të thotë se do të shpaloset një krizë që me një mënyrë ose tjetër duhet të zgjidhet.Ose nëpërmjet dialogut, ose nëpërmjet arbitrazhit ose nëpërmjet Gjyqit të Hagës. Para se të mbërrijmë këtu ka prova e fakte që vërtetojnë se argumentet e palësh shqiptare janë të pabazuara”, shkruan Kathimerini.
Sipas gazetës, pretendimet e palës shqiptare për cënim të integritetit territorial të ujërave shqiptare nga kërkimet për naftë në detin Jon janë politike dhe jo shkencore.
