Një konflikt i ri mes presidentit amerikan Donald Trump dhe mediave amerikane është përshkallëzuar pas vendimit të rrjeteve kryesore televizive për të bojkotuar transmetimin e drejtpërdrejtë të disa ngjarjeve në Shtëpinë e Bardhë. Në përgjigje të këtij vendimi, administrata Trump ka lançuar platformën e saj televizive, të quajtur “Trump TV”.
Shërbimi i ri nisi transmetimet të hënën në mbrëmje dhe, sipas administratës amerikane, do të transmetojë 24 orë në ditë, duke sjellë momente të rëndësishme nga e kaluara, njoftime dhe deklarata, si dhe lajmet më të fundit nga administrata Trump.
“TRUMP TV tani po transmeton. 24/7, i përditësuar në kohë reale, me momente kryesore të së kaluarës, njoftime dhe lajmet më të fundit nga administrata në një vend. Jo çdo moment i rëndësishëm ka mbërritur në televizorin tuaj, tani mundet”, deklaroi administrata.
Transmetimi i parë i platformës së re ishte fjalimi i Trump më 3 korrik në malin Rushmore.
IT’S LIVE. 📺🦅
TRUMP TV IS STREAMING NOW. 24/7, updated in real time, with top past moments, announcements, and the latest and greatest from the administration all in one place.
Not every big moment has made it on your tv, now it can.
📲 https://t.co/3KwWkBZ69m pic.twitter.com/g4v7n2J04s
— The White House (@WhiteHouse) September 21, 2026
Përplasja me rrjetet kryesore televizive
Lançimi i Trump TV erdhi pas vendimit të pesë rrjeteve kryesore televizive që marrin pjesë në të ashtuquajturin grup televiziv të Shtëpisë së Bardhë, për të pezulluar mbulimin televiziv të ngjarjeve presidenciale.
CNN, NBC, ABC, CBS dhe Fox News njoftuan se vendimi do të jetë në fuqi deri në një njoftim të mëtejshëm, në përgjigje të vendimit të Shtëpisë së Bardhë për të ndaluar aksesin e CNN, MS NOW dhe Politico.
Rrjetet nuk transmetuan ceremoninë e prerjes së shiritit për inaugurimin e helipadit të ri presidencial, përpara se Trump të nisej për një vizitë dyditore në Nju Jork.
Në një deklaratë të përbashkët, rrjetet argumentuan se publiku ka të drejtë të marrë informacion të saktë dhe të pavarur mbi qeverinë e tij dhe se qeveria nuk duhet të kufizojë një organizatë mediatike për shkak të mbulimit të saj.
Shtëpia e Bardhë e transmetoi ceremoninë në kanalet e saj në rrjetet sociale, por zhurma e Marine One, helikopterit presidencial që ndodhej pas Trump me motorin ndezur, i bëri komentet e tij të vështira për t’u dëgjuar.
Më vonë gjatë ditës, disa rrjete transmetuan një pjesë të konferencës për shtyp të Trump me kryetarin e bashkisë së Nju Jorkut, Zohrab Mandani.
Duke komentuar vendimin e rrjeteve, Trump tha se nuk ishte shqetësuar nga njoftimi për bojkot.
“Është interesante sepse ata thanë se do të më bojkotonin, por nuk më bojkotuan kurrë, kështu që nuk u shqetësova shumë për këtë”, tha presidenti amerikan.
Më pas, duke treguar nga gazetarët jashtë Gracie Mansion, ai shtoi: “Shikoni të gjithë këtë shtyp”.
Përplasja u përshkallëzua më tej kur disa gazeta, përfshirë The New York Times dhe The Washington Post, njoftuan se nuk do të publikonin fotografi të presidentit të bëra nga fotografët e tyre deri në mesnatë, në solidaritet me rrjetet televizive.
Ndërkohë, CNN, MS NOW dhe Politico ngritën të hënën një padi, duke kërkuar rikthimin e aksesit të tyre në Shtëpinë e Bardhë, pasi gazetarët e tyre u larguan nga ambientet.
Në padinë prej 27 faqesh, tre organizatat argumentojnë se vendimi i Shtëpisë së Bardhë shkel Amendamentin e Parë të Kushtetutës së Shteteve të Bashkuara.
Të pandehurit në këtë çështje janë Donald Trump, drejtori i komunikimit të Shtëpisë së Bardhë Steven Chung, drejtori i Shërbimit Sekret Sean Curran dhe shefja e stafit të Shtëpisë së Bardhë Susie Wiles.
Beteja ligjore
Një seancë dëgjimore është planifikuar për të mërkurën, në orën 15:30, përpara gjykatësit federal Timothy Kelly.
Kelly kishte vendosur gjatë mandatit të parë të Trump se Shtëpia e Bardhë nuk mund të ndalonte hyrjen e korrespondentit të atëhershëm të CNN, Jim Acosta.
Trump kritikoi zgjedhjen e gjykatësit në Truth Social dhe deklaroi se administrata e tij do të apelonte nëse vendimi nuk do të ishte në favor të saj.
“Ata kanë një gjykatës të shkëlqyer për ta, një njeri që vendosi në favor të Jim Acosta, i cili tani duket se është zhdukur nga faqja e planetit. Me fjalë të tjera, pothuajse pa dyshim, si zakonisht, ne do të apelojmë”, shkroi Trump.
“Lajmet e rreme nuk duhet të hyjnë në Shtëpinë e Bardhë”
Kriza nisi pasi Shtëpia e Bardhë refuzoi të akreditonte CNN të hënën, në ditën kur rrjeti ishte përgjegjës për mbulimin televiziv të udhëtimit të Trump në Nju Jork.
Atje presidenti amerikan u takua me kryetarin e bashkisë së Nju Jorkut, Zohrab Mandani, si dhe me presidentin francez Emmanuel Macron, në margjinat e Asamblesë së Përgjithshme të OKB-së.
Mbulimi i aktiviteteve presidenciale vazhdoi nga gazetarë të gazetave, stacioneve radiofonike dhe agjencive të lajmeve, si dhe nga fotografë dhe ekipi i brendshëm i prodhimit të Shtëpisë së Bardhë.
Trump ka argumentuar se mediat që ai i konsideron si pjesë të “lajmeve të rreme” nuk duhet të kenë akses në Shtëpinë e Bardhë.
“Ato janë shumë të këqija për vendin, shumë të këqija për sigurinë kombëtare… Do ta shohim se si do të shkojë”, tha Trump.
Cilët janë gazetarët që Trump la jashtë Shtëpisë së Bardhë?
Në kuadër të kësaj përplasjeje, Trump ka pezulluar dhe revokuar kredencialet e tre gazetareve nga CNN, MS NOW dhe Politico: Betsy Klein e CNN, Akayla Gardner e MS NOW dhe Cheyenne Haslett e Politico.
Të treja kanë histori të ndryshme në mbulimin e administratave amerikane dhe të Shtëpisë së Bardhë.
Betsy Klein – CNN
Betsy Klein e CNN u përball me revokimin e lejes së saj të hyrjes në Shtëpinë e Bardhë.
Ajo tregoi se pasi kaloi nëpër portë dhe kontrollin e sigurisë, zbuloi se karta e saj e kalimit dhe PIN-i special nuk funksiononin më. Sipas saj, një pjesëtar i Shërbimit Sekret që ruante presidentin e referoi atë te Shtëpia e Bardhë për një shpjegim.
Klein është e diplomuar në Universitetin Duke dhe ka qenë pjesë e CNN që nga viti 2014. Më parë ka punuar në ABC News, ku fitoi një çmim Emmy si pjesë e ekipit të “Good Morning America”.
Ajo ka mbuluar qeverinë amerikane që nga viti 2015, gjatë presidencës së Barack Obamës, dhe vijoi mbulimin e Donald Trump gjatë mandatit të tij të parë, si dhe të Joe Biden.
Akayla Gardner – MS NOW
Edhe Akayla Gardner e MS NOW iu revokua leja e kalimit në Shtëpinë e Bardhë.
Ajo ka punuar më parë për Bloomberg News, ku mbuloi administratën e parë të Trump dhe administratën e Joe Biden.
Mandati i dytë i Trump ka qenë më intensiv për Gardner, e cila u bë objekt i kritikave të presidentit pasi e pyeti për koston e sallës së madhe të vallëzimit në Shtëpinë e Bardhë, e cila ishte dyfishuar krahasuar me njoftimet fillestare.
“Ajo që ndodhi është se keni një sallë vallëzimi që është brenda buxhetit. Unë e dyfishova madhësinë sepse padyshim që na duhej dhe tani jemi brenda buxhetit dhe përpara afatit”, kishte thënë Trump.
“Kostoja u dyfishua”, i tha Gardner.
“Unë e dyfishova madhësinë, o budalla”, iu përgjigj Trump.
“Po pishina?”, pyeti sërish gazetarja, duke iu referuar kostos së pishinës, e cila gjithashtu ishte dyfishuar krahasuar me parashikimin fillestar.
“Nuk je njeri i zgjuar”, iu përgjigj Trump.
Cheyenne Haslett – Politico
Gazetarja e tretë, Cheyenne Haslett e Politico-s, mbulon çështjet e shëndetit dhe teknologjisë, si dhe Shtëpinë e Bardhë.
Ajo ka punuar për tetë vjet në ABC News, ku ka mbuluar veçanërisht pandeminë dhe çështjen e abortit. Prej rreth një viti ajo është gazetare në Politico.
Revokimi i aksesit të saj shihet në këtë përplasje edhe në kontekstin e rolit të Politico-s si një media online me ndikim të konsiderueshëm dhe me raportim të fokusuar te korridoret e pushtetit në Uashington.
Përplasja e Trump me mediat që ai i akuzon për transmetim të “lajmeve të rreme” ka qenë e vazhdueshme. Deri së fundmi, ajo ishte shfaqur kryesisht përmes mesazheve të tij në Truth Social, përplasjeve në rrjetet sociale dhe debateve verbale gjatë deklaratave publike.
Tashmë konflikti ka kaluar edhe në planin gjyqësor, pasi CNN, MS NOW dhe Politico i janë drejtuar gjykatës, duke argumentuar se ndalimi i tyre nga Shtëpia e Bardhë shkel të drejtat e mbrojtura nga Amendamenti i Parë i Kushtetutës së Shteteve të Bashkuara.
Përplasja vjen në një moment kur administrata amerikane po përballet me zhvillime të tjera të rëndësishme, ndërsa zgjedhjet e mesit të mandatit janë planifikuar pas rreth një muaji e gjysmë.
Launched.
All the top hits, wins, + more. Streaming 24/7 on your phone or tv.
📺 https://t.co/3KwWkBZ69m pic.twitter.com/oIPfUA0Np9
— The White House (@WhiteHouse) September 22, 2026
