Edhe pse shumë janë tronditur nga sulmet e Donald Trump ndaj institucioneve që garantojnë balancën e pushteteve, besimi në integritetin e sistemit zgjedhor amerikan mbështetet në një parim të fortë kushtetues: në SHBA është përgjegjësi ekskluzive e secilit shtet të administrimit të zgjedhjeve, pikërisht për të shmangur ndërhyrjet e qeverisë federale.
Ndërsa çdo ndryshim me ndikim kombëtar në procesin zgjedhor mund të miratohet vetëm nga Kongresi.
Shënjestra e parë ishte Kongresi, ku Trump nuk ka arritur të sigurojë miratimin e Save Act, një projektligj që parashikon rregulla më të rrepta për dokumentet e nevojshme për regjistrimin në listat zgjedhore.
Një masë e tillë mund të duket normale sipas standardeve evropiane, por në SHBA-të nuk ekziston një kartë identiteti kombëtare dhe pasaportën e zotërojnë kryesisht ata që udhëtojnë jashtë vendit. Për këtë arsye, deri më tani janë përdorur forma të tjera për të verifikuar identitetin e votuesve.
Kritikët argumentojnë se rregullat e reja mund të pengojnë pjesëmarrjen në votime të shtresave më të varfra, afro-amerikanëve dhe hispanikëve, të cilët mund të mos kenë dokumentacionin e kërkuar. Kundërshtime kanë shprehur jo vetëm demokratët, por edhe një pjesë e republikanëve, sidomos përfaqësuesit e zonave rurale, të cilët paralajmërojnë se edhe fermerët mund të hasin vështirësi për të votuar. Një problem shtesë lidhet me gratë e martuara, pasi mbiemri i tyre ligjor shpesh ndryshon nga ai i regjistruar në dokumentet e mëparshme.
Trump, i cili prej muajsh ushtron presion ndaj ligjvënësve republikanë, e përshkallëzoi retorikën duke deklaruar se kushdo që nuk mbështet Save Act po mashtron Amerikën. Ai u bëri thirrje mbështetësve të lëvizjes MAGA të ushtrojnë presion ndaj deputetëve dhe senatorëve në zonat e tyre elektorale. Në të kaluarën, aktivistë të tillë janë akuzuar për përdorimin e metodave frikësuese ndaj politikanëve dhe familjeve të tyre.
Sa i përket ndërhyrjeve të tij në sistemin zgjedhor, të cilat janë bllokuar nga gjykatat si cenim i kompetencave të shteteve, përfshirë urdhrat ekzekutivë kundër votimit me postë dhe për shpërndarjen e fletëve të votimit, Trump përdori Kinën si argument për të kërkuar kompetenca më të gjera federale. Sipas tij, përballë një kërcënimi ndaj sigurisë kombëtare, mbrojtja e autonomisë së shteteve humbet rëndësinë, pasi “pa një sistem zgjedhor të drejtë nuk ka më Amerikë”.
Megjithatë, analistët vënë në dyshim pretendimet se Kina ka ndikuar realisht në rezultatet zgjedhore amerikane. Ata besojnë se edhe vetë Trump nuk i beson plotësisht këtyre akuzave, pasi në të kaluarën ai ka minimizuar vazhdimisht pretendimet për ndërhyrje ruse në zgjedhje. Nëse do t’i konsideronte serioze akuzat ndaj Pekinit, argumentojnë ata, do të ishte detyruar të ndërmerrte masa shumë më të ashpra.
Trump deklaroi gjithashtu se Kina ka siguruar të dhënat personale të 220 milionë amerikanëve, por nuk përmendi faktin se shumica e këtyre të dhënave janë publike ose mund të blihen në databaza komerciale. Ai anashkaloi gjithashtu faktin se, sapo u rikthye në Shtëpinë e Bardhë, ndërhyri për të pezulluar zbatimin e ligjit që synonte ndalimin e TikTok-ut për shkak të shqetësimeve mbi transferimin e të dhënave të përdoruesve amerikanë drejt Kinës. Në atë kohë, ai e justifikoi vendimin duke thënë: “Kam simpati për TikTok-un. Më ndihmoi të fitoj votat e shumë të rinjve.”
Sipas analizës, Trump po përgatitet ta mbajë çështjen e zgjedhjeve në qendër të debatit publik gjatë muajve të ardhshëm. Ndërkohë, ai ka emëruar figura të reja në shërbimet sekrete, FBI dhe Departamentin e Drejtësisë, pasi u nda nga bashkëpunëtorë si Pam Bondi dhe Tulsi Gabbard, të cilët, sipas tij, nuk ishin mjaftueshëm agresivë ndaj kundërshtarëve politikë.
Presidenti ka zgjedhur tashmë njerëz më të vendosur, të gatshëm të evidentojnë dhe zmadhojnë edhe parregullsitë më të vogla, nëse ato ekzistojnë. Analistët paralajmërojnë se SHBA-të mund të zhvillojnë zgjedhjet në një klimë tensioni dhe kaosi, me rrezikun që procesi i numërimit të votave të bllokohet nëse Trump arrin të vërë në pikëpyetje përdorimin e makinave elektronike të numërimit, të cilat ai prej kohësh i konsideron të manipulueshme. Detyra e ekipit të tij do të jetë të provojë se këto sisteme janë të cenueshme.
