Një gjykatë federale e apelit në Shtetet e Bashkuara ka lënë në fuqi vendimin që bllokon urdhrin ekzekutiv të presidentit Donald Trump për krijimin e një liste federale të votuesve të kualifikuar dhe kufizimin e dërgimit të fletëve të votimit me postë vetëm për personat që ndodhen në atë listë.
Vendimi rrëzon përpjekjen e administratës Trump për të zbatuar këto kufizime në 23 shtete amerikane, të cilat kishin ngritur padi përpara zgjedhjeve të ndërmjetme të nëntorit.
Ndërkohë, Presidenti Trump pritet të vizitojë këtë të hënë, 27 korrik, periferinë e Detroitit, ku do të mbrojë politikat e tij ekonomike dhe tarifat e vendosura ndaj importeve. Ai synon të theksojë se këto masa kanë ndihmuar ekonominë amerikane, edhe pse shumë biznese në këtë shtet kyç pretendojnë se janë dëmtuar nga tarifat, ndërsa fushata për zgjedhjet e ndërmjetme po intensifikohet.
Sa i takon zhvillimeve ndërkombëtare, Shtetet e Bashkuara dhe Irani ndërprenë sulmet për të dytën ditë radhazi të dielën, 26 korrik, ndërsa vazhdojnë përpjekjet për rikthimin e palëve në negociata për një marrëveshje të përkohshme armëpushimi.
Ende nuk është e qartë pse Washingtoni ka ndalur operacionet ushtarake, pasi për gati dy javë kishte goditur zona bregdetare dhe infrastrukturë iraniane, pas përshkallëzimit të tensioneve të shkaktuara nga sulmet e Iranit ndaj anijeve që kalonin në Ngushticën e Hormuzit.
