Presidenti amerikan shton presionin mbi Rezervën Federale dhe nis një ofensivë komunikimi në shtetet kyçe, mes rritjes së çmimeve dhe pakënaqësisë së elektoratit.
Presidenti Donald Trump po përballet me pakënaqësi në rritje mes qytetarëve, të cilët thonë se premtimi për një “epokë të re të artë” nuk është reflektuar në ekonominë familjare. Rritja e kostos së jetesës dhe vështirësia për të përballuar shpenzimet ditore kanë goditur fort mbështetjen politike të republikanëve, të cilët humbën në zgjedhjet e nëntorit dhe rrezikojnë shumicën në Kongres në zgjedhjet afatmesme të vitit të ardhshëm.
Për të frenuar këtë trend, Trump ka shtuar presionin ndaj Rezervës Federale që të ulë normat e interesit dhe ka nisur një fushatë intensive komunikimi në shtetet vendimtare. Në një tubim në Mount Pocono, Pensilvani, ai deklaroi se tarifat doganore kanë sjellë investimet më të mëdha në historinë e vendit. “Funksionojnë aq mirë sa tani edhe europianët duan të na kopjojnë”, tha ai.
Rritja e çmimeve mbetet shqetësimi kryesor i votuesve amerikanë. Sipas analistëve, një nga gabimet e Joe Biden ishte nënvlerësimi i inflacionit, i cili u përkeqësua nga subvencionet e mëdha qeveritare. Inflacioni i lartë ndikoi në humbjen e demokratëve në disa gara të rëndësishme, ndërsa sondazhi i fundit i Gallup tregon se vetëm 36% e amerikanëve miratojnë politikat ekonomike të presidentit aktual.
Edhe pse ekonomia amerikane nuk paraqet shenja recesioni, rritja e çmimeve vazhdon dhe premtimi për uljen e tyre nuk është realizuar. Kjo ka krijuar një ndjenjë zhgënjimi të thellë mes elektoratit.
Tarifat doganore të vendosura nga administrata Trump po japin efekte të prekshme, por jo ato të pritura. Ndërsa shteti ka arkëtuar miliarda dollarë nga tarifat, fermerët amerikanë janë ndër më të goditurit, sidomos pas vendimit të Kinës për të ndalur blerjen e sojës nga SHBA. Për të shmangur falimentime masive në Midwest, qeveria ka akorduar rreth 12 miliardë dollarë subvencione, një praktikë jo e zakonshme për Partinë Republikane, që tradicionalisht mbron tregun e lirë.
Kështu, administrata po gjendet përballë një situate paradoksale: tarifat sjellin të ardhura, por po detyrojnë qeverinë të shpenzojë miliona për të kompensuar dëmet që vetë tarifat kanë shkaktuar.
Tensionet në bazën “MAGA” janë shtuar edhe nga vendimi i fundit i Trump për të lejuar kompaninë Nvidia të shesë çipe të avancuara në Kinë, hap që sinjalizon mbështetjen e tij për zhvillimin e inteligjencës artificiale. Por ky orientim drejt teknologjisë së lartë ka irrituar mbështetësit populistë të presidentit, të cilët ndihen të anashkaluar në raport me korporatat e mëdha të Silicon Valley-t.
Trump pritet të intensifikojë fushatën e tij për të adresuar pakënaqësitë ekonomike dhe për të ruajtur avantazhin politik në prag të zgjedhjeve të vitit të ardhshëm.
