Presidenti amerikan Donald Trump ka hedhur poshtë deklaratat e këshilltarit të tij për Sigurinë Kombëtare, John Bolton, duke thënë se i ashtuquajturi “Model i Libisë” nuk do të përdoret për çnuklearizimin e Koresë Veriore. Një deklaratë e tillë e bërë nga Bolton ka zemëruar Korenë e Veriut, e cila ka kërcënuar se mund të tërhiqet nga samiti i planifikuar me Trumpin në muajin qershor.
Trump ka thënë se ende mendon se samiti do të ndodhë. Sipas tij, “Kim Jong-un do të jetë në shtetin e tij, do të vazhdojë të udhëheqë vendin e tij, dhe territori i tij do të jetë i pasur”. “Nëse shikoni Korenë Jugore, atëherë do të duhej të ishte modeli jugkorean në aspektin e industrisë së tyre. Ata janë shumë punëtorë, njerëz të jashtëzakonshëm”, ka thënë presidenti amerikan.
Më 2013, lideri i Libisë Muamaar Gaddafi kishte rënë dakord për të hequr dorë nga programi bërthamor në këmbim të heqjes së sanksioneve. Disa vjet më vonë ai u vra nga rebelët e përkrahur nga Perëndimi, një krahasim që duket të ketë alarmuar liderin koreano verior, Kim Jong-un. Pheniani ka paralajmëruar të mërkurën se mund të mos marrë pjesë në samitin që është planifikuar të mbahet më 12 qershor në Singapor.
ma.me
