Franca ka kërkuar që BE t’i përgjigjet kërcënimit të fundit tarifor të Donald Trump, pasi presidenti amerikan zbuloi planet për rritjen e taksave me 25 % për të gjitha importet e çelikut dhe aluminit në SHBA.
Ministri i Jashtëm francez, Jean-Noel Barrot, theksoi se Bashkimi Evropian nuk duhet të hezitojë të mbrojë interesat e tij dhe se është koha për të ndërmarrë masa hakmarrëse, siç ndodhi edhe në vitin 2018, kur Trump mori hapa të ngjashëm.
Ai tha se BE nuk sheh “asnjë justifikim” për tarifat e metaleve të Trump, por shtoi se BE duhet të jetë gati të përgjigjet deri sa të ketë sqarime të detajuar për tarifat e reja.
“BE nuk sheh asnjë justifikim për vendosjen e tarifave mbi eksportet e saj. Ne do të reagojmë për të mbrojtur interesat e bizneseve, punëtorëve dhe konsumatorëve evropianë nga masat e pajustifikuara. Ne do të reagojmë në kohën e duhur për të mbrojtur eksportet tona” tha Barrot.
Ky reagim vjen pas përpjekjeve të Trump për të rritur tarifat për importet e çelikut dhe aluminit në SHBA, plan që mesa duket po thellon përplasjen tregtare mes BE dhe SHBA-së
“Komisioni Evropian është gati të shtyjë këmbëzën kur të ketë ardhur koha. Tani ka ardhur kjo kohë. Nuk është në interesin e askujt që të fillojë një luftë tregtare me Bashkimin Evropian”, u shpreh Barrot.
Trump paralajmëroi shpalljen e një taksë importi prej 25% për të gjithë çelikun dhe aluminin që hyjnë në SHBA, një lëvizje që do të ketë ndikimin më të madh në Kanada, por edhe në BE, megjithatë detajet mbi tarifat reciproke për vendet që importojnë në SHBA do të bëhen me dije në vijim.
Javën e kaluar, presidenti amerikan ishte zotuar për një përshkallëzim të tarifave për të adresuar një çekuilibër në tregtinë midis SHBA-së dhe botës.
