Favoriti kryesor në primaret republikane, Donald Trump përmendi tre nga kundërshtarët e partisë së tij për mundësinë e zgjedhjes së tyre në postin e zëvendëspresidentit, nëse arrin të zgjidhet në krye të Shtëpisë së Bardhë.
“Unë njoh emra me potencial të përshtatshëm për postin e zëvendëspresidentit. Nuk kam përzgjedhur ende një emër në veçanti. Unë preferoj Marcon (Rubio), (John) Kasichin, (Scott) Walkerin për shumë arsye. Kam luftuar ashpër me ta, por i kam admiruar gjithnjë”, deklaroi miliarderi për të përditshmen ”USA Today”.
“Ka disa persona që unë admiroj edhe pse besoj se ata nuk ushqejnë simpati ndaj meje për shkak të konfrontimeve të drejtpërdrejta”, shtoi ai.
Manjati i pasurive të patundshme, rishtar në politikë është shprehur i gatshëm për krijimin e aleancave të reja duke përfshirë edhe ata që e kanë sulmuar gjatë primareve.
