Presidenti Donald Trump urdhëroi linjat ajrore në Shtetet e Bashkuara të pezullojnë avionët 737 Max 8 të Boeingut, duke anuluar një vendim të mëparshëm nga rregullatorët amerikanë për të mbajtur avionët në fluturim pas një aksidenti të dytë vdekjeprurës që përfshiu një nga avionët e këtij lloji në Etiopi.
Administrata Federale e Aviacionit për ditë me radhë u rezistoi thirrjeve për të pezulluar avionin edhe kur rregullatorët e sigurisë të 42 vendeve i kishin ndaluar fluturimet me avionin 737 Max 8. Deri të martën, agjencia i qëndroi vlerësimit se nuk kishte parë “çështje sistematike të performancës” që do ta bënte atë të ndante fluturimet e avionit.
Edhe Kanadaja vendosi sot të mbyllë hapësirën e saj ajrore menjëherë dhe deri në një urdhër të ri për avionët model “Boeing 737 MAX 8” dhe “Boeing 737 MAX 9”, pas aksidentit tragjik të njërit prej këtyre avionëve të dielën në Etiopi, njoftoi ministri i Transporteve, Marc Garneau.
“Ky vendim u mor nga qeveria kanadeze pasi mori të mërkurën në mëngjes të dhëna të reja në lidhje me rrethanat e këtij aksidenti që shkaktoi vdekjen e 157 të vdekurve, mes të cilëve edhe 18 kanadezë”, shpjegoi ministri Garneau në një konferencë për shtyp.
Përplasja e avionit të shoqërisë ajrore Ethiopian Airlines 302 shkaktoi vdekjen e të gjithë 157 personave në bord. Në tetor, një avion Boeing 737 Max 8 i shoqërisë Lion Air, në Indonezi, u rrëzua në rrethana të ngjashme dhe shkaktoi vrasjen e 189 njerëzve në bord.
