Presidenti amerikan, Donald Trump, ka reaguar ashpër pasi nuk u shpall fitues i Çmimit Nobel për Paqen 2026.
Ai kritikoi Norvegjinë, pasi çmimi iu dha juristes nga Afrika e Jugut, Navi Pillay.
Gjatë një tubimi në Syracuse, në shtetin e New York-ut, Trump pretendoi se ky vlerësim i takonte SHBA-ve për shkak të rolit të tij në zgjidhjen e konflikteve ndërkombëtare.
“SHBA-të, përfaqësuar nga unë si president, duhej të kishin marrë Çmimin Nobel për Paqen. Kjo është një njollë e pashlyeshme për Norvegjinë dhe për ata që morën këtë vendim të turpshëm”, deklaroi ai.
Trump shkoi më tej, duke thënë se vendimi e ka diskredituar çmimin dhe se Washingtoni nuk do ta harrojë atë që ndodhi.
Ai i cilësoi vendimmarrësit si “ideologë radikalë”, që sipas tij janë kundër demokracisë dhe qytetërimit.
Kreu i Shtëpisë së Bardhë foli edhe për luftën me Iranin dhe konfliktin mes Rusisë dhe Ukrainës, duke pretenduar se synon t’u japë fund të dyjave sa më shpejt.
Për Teheranin, ai përdori tone kërcënuese:
Çështja e Iranit do të zgjidhet shumë shpejt, në një mënyrë ose në një tjetër: ose na japin gjithçka, ose nuk do të ekzistojnë më!
Trump pretendoi gjithashtu se kishte penguar Iranin të siguronte armë bërthamore dhe se kishte shpëtuar më shumë jetë njerëzish se kushdo tjetër në histori.
Megjithatë, sipas The Guardian, agjencitë amerikane të inteligjencës i kishin raportuar Kongresit në vitin 2025 se Irani e kishte pezulluar programin e zhvillimit të armëve bërthamore që në vitin 2003.
Duke komentuar zgjedhjen e fitueses, Trump tha se çmimi i ishte dhënë një personi me bindje liberale, që punon në Kombet e Bashkuara dhe që, sipas tij, nuk e njeh askush.
Navi Pillay është juriste nga Afrika e Jugut dhe ish-komisionere e lartë e OKB-së për të drejtat e njeriut.
Ajo ka drejtuar një komision të Kombeve të Bashkuara që arriti në përfundimin se Izraeli kishte kryer gjenocid në Gaza, një përfundim që Izraeli e ka kundërshtuar.
Reagimi i Trump-it vjen në një kohë kur SHBA-të janë përfshirë në luftën kundër Iranit, ndërsa presidenti vazhdon të pretendojë se ka luajtur rol vendimtar në zgjidhjen e konflikteve në mbarë botën.
