Deklaratat e Donald Trump për vjedhjen e zgjedhjeve, të cilat nuk janë vërtetuar nga asnjë dëshmi, mund të dëmtojnë fushatën tradicionale të qetë dhe të rrezikojnë idenë e procesit të ndershëm demokratik, shkruajnë mediat e huaja.
“Për të qenë i sinqertë, kam frikë se zgjedhjet do të manipulohen”, ka thënë Trump në Columbus, Ohio, dhe ka shtuar se “më shumë dhe më shpesh dëgjohet se zgjedhjet nuk do të jenë të ndershme”, pa dhënë ndonjë hollësi.
Trump këtë pretendim e ka bërë pas dyshimeve të para se demokratët e kanë përshtatur sistemin e tyre të zgjedhjeve në mënyrë që Hillary Clinton të fitojë ndaj kundërkandidatit tjetër Barney Sanders.
Trump gjithashtu ka bërë një “vlerësim” për dy kandidatët demokratë. Sipas tij, “Hillary Clinton është djalli” dhe se sipas tij, Sanders “bëri një pakt me djallin”.
Hillary Clinton nuk ka bërë komente për këto deklarata.
Biznesmeni amerikan tashmë është i njohur për teoritë e shumëllojshme konspirative.
Më parë ai kishte thënë se Presidenti Barack Obama nuk ka lindur në Shtetet e Bashkuara dhe se babai i senatorit Ted Cruz ishte i përfshirë në vrasjen e John F. Kennedy.
“Ne duhet të jemi të kujdesshëm më 8 nëntor, pasi zgjedhjet mund të manipulohen. Shpresoj se republikanët do të arrijnë të monitorojnë me kujdes procesin, përndryshe zgjedhjet do të jenë të vjedhura”, ka thënë Trump.
