Presidenti Donald Trump ka përsëritur pozicionin e tij se Shtetet e Bashkuara kanë nevojë për Groenlandën për arsye të sigurisë kombëtare, në një postim në mediat sociale para takimit të zëvendëspresidentit JD Vance me zyrtarët danezë.
Trump ka thënë se SHBA-të do të marrë Groenlandën “qoftë nëse u pëlqen apo jo” duke shtuar se preferon një marrëveshje të lehtë, por nëse jo, do ta bëjnë “në mënyrën e vështirë”.
Deklaratat e Trumpit janë pritur me shqetësim nga lidershipi në Kopenhagen dhe kryeqytetet e tjera evropiane.
Trump shtoi se NATO do të bëhej “shumë më e fuqishme dhe efektive” nëse Groenlanda do të ishte në duart e SHBA-ve, dhe se “çdo gjë më pak se kjo është e papranueshme”.
Qëndrimet e Trumpit për të marrë me forcë Groenlandën kanë ngritur pikëpyetje për implikimet në NATO (ku të dyja SHBA-të dhe Danimarka janë anëtare dhe duhet të mbrojnë njëra-tjetrën në rast sulmi).
Groenlanda është territor autonom i Mbretërisë së Danimarkës, me rëndësi strategjike në Arktik për shkak të burimeve natyrore, rrugëve të reja detare nga ndryshimet klimatike dhe bazave ushtarake amerikane ekzistuese.
Udhëheqësit e Groenlandës dhe Danimarkës kanë përsëritur se territori nuk është në shitje dhe preferojnë të mbeten me Danimarkën.
Kryeministri i Groenlandës, Jens-Frederik Nielsen, tha se “Groenlanda nuk dëshiron të zotërohet nga SHBA-të, nuk dëshiron të qeveriset nga SHBA-të, nuk dëshiron të jetë pjesë e SHBA-ve”.’
