Presidenti amerikan Donald Trump ka deklaruar se nuk do të ishte kundër që prodhuesit kinezë të automjeteve të ndërtonin makina në Shtetet e Bashkuara, duke sfiduar qëndrimin e ligjvënësve dhe kompanive amerikane të sektorit.
Në një intervistë për Fox News, Trump tha se do ta mbështeste një investim të tillë me kusht që kompanitë kineze të prodhonin automjetet në SHBA dhe të punësonin punëtorë amerikanë.
“Nëse Kina do të donte të vinte dhe të hapte një fabrikë për të ndërtuar makinat e saj këtu, unë do të isha dakord me këtë”, tha Trump. Ai solli si shembull Japoninë, duke theksuar se kompanitë japoneze prodhojnë automjete në SHBA dhe punësojnë punëtorë vendas. “Gjëja e rëndësishme është që ata punësojnë njerëzit tanë”, shtoi presidenti amerikan. Trump tha gjithashtu se nuk dëshiron që kompanitë kineze të ndërtojnë automjetet në Meksikë dhe më pas t’i eksportojnë ato drejt tregut amerikan. “Unë nuk i përçmoj makinat kineze”, u shpreh ai.
Deklaratat vijnë ndërsa prodhuesit amerikanë të automjeteve i kanë kërkuar administratës Trump të mos lejojë kompanitë kineze të fitojnë akses më të madh në tregun amerikan. Çështja merr rëndësi të veçantë edhe për shkak të takimit të planifikuar mes Trump dhe presidentit kinez Xi Jinping në Uashington.
Senatorja demokrate e Michiganit, Elissa Slotkin, kishte deklaruar më herët se qarkullonin zëra se Trump mund të lejonte shitjen e automjeteve kineze në SHBA si pjesë e një marrëveshjeje më të gjerë me Pekinin. Ajo e cilësoi një mundësi të tillë si “një gabim strategjik”.
Trump i hodhi poshtë këto pretendime, duke i cilësuar si “një thashethem krejtësisht të pabazuar” dhe duke theksuar se administrata e tij po i mban automjetet kineze jashtë tregut amerikan.
Administrata e ish-presidentit Joe Biden vendosi në fillim të vitit 2025 kufizime që ndalojnë prodhuesit kinezë të shesin ose të ndërtojnë automjete pasagjerësh në SHBA. Ndërkohë, Uashingtoni aplikon tarifa që kalojnë 100% për automjetet elektrike të prodhuara në Kinë.
