Administrata e presidentit amerikan Donald Trump pritet të shpenzojë më shumë se 900 milionë dollarë për një sërë projektesh ndërtimi dhe rikonstruksioni në kompleksin e Shtëpisë së Bardhë, ku pjesa më e madhe e financimit besohet se do të vijë nga fondet publike, raportojnë mediat amerikane.
Sipas Washington Post, administrata ka siguruar paratë përmes transfertave nga agjenci të ndryshme federale dhe kontributeve private, pa kërkuar një financim të drejtpërdrejtë nga Kongresi.
Fondet janë transferuar në llogarinë e posaçme për riparimin dhe restaurimin e Rezidencës Ekzekutive, për projekte që Shtëpia e Bardhë i cilëson si pjesë të modernizimit të kompleksit.
Mes ndërhyrjeve të planifikuara janë ndërtimi i një salle të madhe pritjesh në Krahun Lindor, rikualifikimi i sheshit Lafayette, ndërtimi i një heliporti, krijimi i një qendre të re për kontrollin e vizitorëve dhe punime të tjera infrastrukturore. Kostoja e përgjithshme e projekteve vlerësohet të arrijë të paktën 927 milionë dollarë.
Plani është përballur edhe me një pengesë ligjore. Një gjykatë federale apeli vendosi të premten se ndërtimi i sallës së re në Krahun Lindor kërkon miratimin e Kongresit.
Në vendimin e tyre, gjyqtarët Patricia A. Millett dhe Bradley N. Garcia theksuan se Kongresi ka kompetencën ekskluzive për të autorizuar ndërtimin ose prishjen e strukturave në kompleksin e Shtëpisë së Bardhë.
Trump ka deklaruar se do ta apelojë vendimin. Ndërkohë, Shtëpia e Bardhë nuk ka publikuar një shifër përfundimtare për të gjithë projektin dhe as nuk ka dhënë detaje të plota mbi burimet e financimit.
Zëdhënësi i Shtëpisë së Bardhë, Davis Ingle, mbrojti projektet, duke thënë se ato po realizohen në përputhje me qëllimet e përcaktuara nga Kongresi. Sipas tij, Trump po punon për të përmirësuar dhe modernizuar objektet e Shtëpisë së Bardhë, në mënyrë që ato të jenë në gjendje të mirë edhe për brezat e ardhshëm.
Sipas të dhënave të cituara nga Washington Post, administrata Trump ka transferuar rreth 875 milionë dollarë në llogarinë e mirëmbajtjes së Rezidencës Ekzekutive që prej marrjes së detyrës. Kjo shumë është dukshëm më e lartë krahasuar me fondet e zakonshme, të cilat në vitet e fundit kanë qenë rreth 2.5 milionë dollarë në vit.
Raporti ngre gjithashtu pikëpyetje mbi transparencën e shpenzimeve, pasi kontratat po administrohen përmes Rezidencës Ekzekutive, një strukturë që nuk i nënshtrohet të njëjtave kërkesa për transparencë dhe publikim të të dhënave si shumica e agjencive federale.
