Presidenti Donald Trump ka thënë se Gjermania i ka borxh Nato-s “shuma të mëdha parash” dhe duhet ta paguajë SHBA-në më shumë për ta mbrojtur atë. Ai e bëri këtë deklaratë në një seri postimesh në Twitter këtë mëngjes.
Trump, pasi doli një video ku ai shihet duke e injoruar zonjën Merkel, tha: “Pavarësisht asaj që keni dëgjuar nga LAJMET E RREJSHME, unë pata një takim të MREKULLUESHËM me Kancelaren Gjermane Angela Merkel”, transmeton Gazeta Express.
“Megjithatë, Gjermania i ka borxh shuma të mëdha parash Natos dhe SHBA duhet të paguhet më shumë për sigurinë e fuqishme, dhe shumë të shtrenjtë, që e ofron për Gjermaninë”, tha ai.
Para inaugurimit të tij, Trump kishte deklaruar se Nato është “vjetruar”, por që tani ai duket se ka ndryshuar qëndrimin e tij, duke iu thënë udhëheqësve evropianë se aleanca mbetet e një rëndësie strategjike.
Vetëm SHBA dhe katër anëtarë të tjerë të aleancës aktualisht plotësojnë standardin e shpenzimeve të aleancës, duke shpenzuar 2% të GDP-së në mbrojtje. Gjermania aktualisht shpenzon 1.23%, por kjo përqindje është duke u rritur. (b.an)
