Vendimi i Gjykatës Supreme që hedh poshtë kërkesën e Kolorados për t’i ndaluar ish-presidentit, Donald Trump të garojë në primaret e këtij shteti, u bë për të shmangur kaosin. Analistët shprehen se pasojat për rastin do të jenë të menjëhershme në kuptimin që edhe shtete të tjera nuk do të jenë në gjendje ta heqin Trumpin nga fletëvotimet e tyre.
Sipas profesoreshës së Shkollës së Drejtësisë Perëndimore të Kalifornisë Nancy Marcus, Gjykata e Lartë nuk e anuloi konstatimin e gjykatës së Kolorados se Trump u përfshi në një kryengritje, por kjo mund t’u japë prokurorëve të drejtën për ta ndjekur më tej çështjen në nivel federal, megjithëse nuk ka pasur asnjë tregues të menjëhershëm se ata do ta bëjnë këtë.
“Ka një lloj gjuhe vërtet interesante midis këtyre, këtyre përfundimeve. Dhe këtu ngrihet pyetja se çfarë do të ndodhë më pas? Do të ishte mjaft e vështirë në këtë fazë që legjislacioni të miratohej nga Kongresi. Kongresi nuk do të bie dakord në një mënyrë apo tjetrën për këtë çështje. Por Departamenti i Drejtësisë mund të ketë disa rrugë për të ndjekur nëse me të vërtetë beson se Trump u përfshi në kryengritje dhe se dikush që përfshihet në kryengritje nuk duhet të mbajë poste. Unë mendoj se ata mund të fillojnë të hetojnë mënyrat se si mund ta ndjekin këtë çështje.”
Për shumë analistë të tjerë vendimi i Gjykatës Supreme që lejoi që Donald Trump të rikthehej në votim nuk është në asnjë mënyrë një fitore për Trump. Sipas Noah Bookbinder, ekspert për etikën në Uashington shprehet se tani është e qartë se Trump udhëhoqi kryengritjen e 6 janarit dhe do të jetë në dorën e popullit amerikan që të vendosë në 5 nëntor.
Por ky vendim është shumë zhgënjyes për shumë njerëz.
“Unë jam i befasuar që Trump do të jetë përsëri në fletëvotim. Nuk mendoj se ai ka krijuar besim tek njerëzit. Jam vërtet i frikësuar për të ardhmen e të gjithëve ne dhe vetëm fakti që ai mund të hyjë sërish në fletëvotim është disi i frikshëm.”
Ky vendim u jep fund përpjekjeve në shtetet si Kolorado, Illinoi dhe Mein për ta hequr emrin e Trump nga fletëvotimi, ndërsa ai është kandidati kryesor republikan për të fituar emërimin e kësaj partie mes fitoresh dominuese në disa shtete. Çështja e Trump përbën herën e parë që Gjykata e Lartë shqyrton një nen që synon t’ua ndalojë ish zyrtarëve që kishin poste publike dhe që “morën pjesë në kryengritje”, rikthimin në poste të tilla. Vendimi i Gjykatës Supreme vjen kur 16 shtete amerikane do të organizojnë njëkohësisht votimet për zgjedhjet paraprake brenda partive.
/a.r
