Si shqetësuese e ka cilësuar ish-presidenti i Kosovës, Hashim Thaçi, faktin se për 5 vjet Kosova ka arritur të sigurojë vetë dy njohje dhe asnjë anëtarësim në organizata ndërkombëtare.
Në një intervistë nga paraburgimi në Dhomat e Specializuara të Kosovës, Thaçi ka vlerësuar se koha e Administratës së Joe Biden ka qenë kohë dhe mundësi e humbur për Kosovën në rrafshin ndërkombëtar.
“Rikthimi i Presidentit Trump paraqet mundësi të re të artë për Kosovën dhe gjithë Ballkanin Perëndimor. Trump është i përcaktuar qartë për paqe dhe bashkëpunim mes popujve. Të rikujtojmë, njohja e parafundit Kosovës i erdhi nga Izraeli, me punën dhe angazhimin e drejtpërdrejt të Presidentit Trump dhe Ambasadorit Grenell”, tha ai për Klan Kosova.
Në vlerësimin e tij presidenti aktual i Shteteve të Bashkuara të Amerikës, Donald Trump e njeh Kosovën mjaft mirë.
“Edhe mesazhi i fundit drejtuar popullit të Kosovës me 17 shkurt të këtij viti nga Trump ishte shumë inkurajues. Disa prej zyrtarëve të lartë aktualë në Uashington janë të involvuar për kohë të gjatë me çështjen e Kosovës dhe shqiptarëve në përgjithësi. Ata nuk veprojnë pa i vënë dikush në lëvizje. Në këtë drejtim do të ishte me interes të ndodhte një koordinim mes Prishtinës dhe Tiranës. Shqipëria po tregohet më efektive”, ka shtuar ai.
Thaçi për Banjskën: Si u lejua largimi i të armatosurve pa pengesë, sikur të ishin krushq lirie?
I pyetur për agresionin në Banjskë të Zveçanit që ndodhi më 24 shtator të vitit 2023, Thaçi vlerësoi se, në këtë ngjarje, Kosova e kishte në dorë “edhe shkopin edhe karotën”, teksa ka ngritur pikëpyetjen se si ndodhi të shfaqeshin mbi 80 njerëz të uniformuar dhe të armatosur me dhjetëra kilometra brenda territorit të Kosovës.
“Kosova kishte në dorë edhe shkopin edhe karotën, si ndodhi të shfaqen mbi 80 njerëz të uniformuar dhe të armatosur me dhjetëra kilometra në brendësi të territorit të Kosovës?”.
“Si ndodhi tolerimi i largimit të tyre qetësisht në pikë të ditës sikur të ishin ‘krushq të lirisë’ e jo atakues të lirisë dhe shtetit?”, u shpreh Thaçi në Rubikon në Klan Kosova.
Tutje, ai tha se si erdhi deri te “Banjska”, vetëm drejtësia në bazë të një hetimi të thellë dhe të gjerë në bashkëpunim me ndërkombëtaret në një proces transpranet mund ta zbardh të vërtetën.
Thaçi për Gjykatën Speciale: Nuk ndihem i tradhtuar, por i abuzuar nga diçka fiktive
Ish-presidenti i Kosovës, Hashim Thaçi, në një intervistë nga paraburgimi në Dhomat e Specializuara të Kosovës në Hagë, ka thënë se nuk ndihet i tradhtuar apo i mashtruar nga Perëndimi në raport me Gjykatën Speciale.
“Ndihem i abuzuar nga ata që në emër të diçkaje fiktive pa të drejtë më shkëputën nga familja, me përjashtuan nga puna, m’i morën vitet më të bukura të jetës. Perëndimi dhe SHBA-të nuk servuan rrëfimin e lëndës”, tha ai në një intervistë për Klan Kosova.
I pyetur se si do të vepronte tash në raport me Gjykatën Speciale, Thaçi ka potencuar se nga raporti i ish-senatorit zviceran Dick Marty nuk do të akuzohej askush.
“Sepse akuzat ishin të pabaza, siç edhe u vërtetua me vonë. Por me kalimin e kohës, gjërat morën drejtim dhe trajtim tjetër, ndodhi ajo që ndodhi”, ka shtuar ai.
Sipas tij po do të bënte gjënë e kundërt në raport me Gjykatën Speciale do të akuzohej nga po të njëjtit njerëz se pse nuk u themelua Gjykata Speciale nga institucionet e Kosovës bashkë me Perëndimin.
